Բացի այն, որ Ադրբեջանն ուզում է բնապահպանական խնդրի շղարշի տակ միջազգային հանրությանը հրամցնել ակնհայտ սխալ իրողություն, նաև հստակ ծրագիր ունի «կոտրել» Արցախի տնտեսության մեջքը: Այս մասին Armenia Today-ի հետ զրույցում ասաց Արցախի արտաքին գործերի նախարարի ժ/պ Դավիթ Բաբայանը՝ ներկայացնելով իրավիճակը Շուշիից Ստեփանակերտ տանող ճանապարհին, որը դեկտեմբերի 12-ի ժամը 10:30-ից սկսած՝ փակել են մի խումբ ադրբեջանցիներ:
Ըստ նախարարի ժ/պ-ի՝ ակնհայտ է, որ չկա որևէ բնապահպանական խնդիր, պարզապես ադրբեջանցիները ցանկանում են զրկել Արցախին կարևորագույն ենթակառուցվածքից, ինչպիսին Կաշենի լեռնահանքային համալիրն է` «Բեյզ Մեթըլս» շահագործող ընկերությամբ:
«Նրանք փորձում են այդպիսով կաթվածահար անել այդ կազմակերպությունը, իսկ դա մեր պետական բյուջեի կարևոր եկամտի աղբյուրներից մեկն է: Մենք գործ ունենք լավ կազմակերպված սադրանքի հետ. Ադրբեջանի տարբեր քաղաքներից ու գյուղերից մարդկանց, երեխաների են բերել, որոնք երևի այդտեղ չեն էլ ապրում, թատրոնի բեմադրություն են սարքել»,- ասաց նախարարի ժ/պ-ն:
Չնայած արցախահայերի համատարած վրդովմունքի, որն անշուշտ հիմնավոր է ըստ Բաբայանի, պետք է սառնասրտություն պահպանել և կշռադատված մոտեցում ցուցաբերել:
«Սա կենացների ու էմոցիաների դաշտ չէ: Հասկանում ենք մեր բնակչության վրդովմունքը, քանի որ այն ինչ անում է Ադրբեջանը, խայտառակություն է, միևնույն ժամանակ չպետք է սադրանքների զոհ դառնանք, որովհետև ի դեմս Ադրբեջանի ունենք մի երկիր, որը հենց դա է ուզում»,- նշեց Բաբայանը՝ հավելելով, որ ամեն ինչ պետք է անել, որպեսզի մեր կողմից որևէ կորուստ չլինի: Ահա թե ինչու, նրա խոսքով, ցանկալի չէ հավաքվել տեղում՝ ի պատասխան ադրբեջանական ցուցարարների գործողությունների:
Ինչ վերաբերում է Արցախի իշխանությունների գործողություններին, ապա Բաբայանի խոսքով՝ փորձ է արվում իրավիճակը կայունացնել ռուս խաղաղապահների հետ միասին:
«Առանց ռուս խաղաղապահ առաքելության անհնարին է այս հարցը կարգավորել: Սակայն ի դեմս Ադրբեջանի մենք գործ ունենք մանիպուլյատոր երկրի հետ, երկիր, որն ատելությամբ է լի և՛ հայության, և՛ ռուսների նկատմամբ, անհարգալից վերաբերմունք ունի միջազգային իրավունքի նկատմամբ»,- ասաց Բաբայանը՝ նշելով, որ աշխատանքները ճանապարհը բացելու ուղղությամբ շարունակվում են:
Դավիթ Բաբայանն ընդգծեց, որ այն, ինչ կատարվում է, կրում է իր մեջ ցեղասպան քաղաքականություն, միջազգային նորմերի կոպիտ խախտում: Դա բռնաճնշում է Արցախի նկատմամբ՝ մարդասիրական, իրավական, քաղաքական իմաստներով և լուրջ ու բիրտ հարված՝ ռուս խաղաղապահ առաքելության նկատմամբ:
Հիշեցնենք, որ դեկտեմբերի 12-ին ժամը 10։30-ի սահմաններում, մի խումբ ադրբեջանցիներ` «բնապահպանական» պատճառաբանություններով փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները: Այսօրվա դրությամբ ճանապարհը շարունակում է փակ մնալ:
Ադրբեջանի կողմից Արցախն արտաքին աշխարհի հետ կապող միջանցքի արգելափակման հետևանքով ստեղծված ռազմաքաղաքական իրավիճակը լուծելու նպատակով ԱԽ ընդլայնված նիստ է հրավիրվել, որտեղ որոշվել է նամակով դիմել ՌԴ խաղաղապահ զորակազմի հրամանատարությանը:
Արաքսյա Սնխչյան
