ՌԴ ԱԳ փոխնախարար Անդրեյ Ռուդենկոն մեկնաբանել է Արցախում տեղակայված ռուս խաղաղապահների մանդատը 20 տարով երկարաձգելու վերաբերյալ վարչապետ Նիկոլ Փաշինյանը հայտարարությունը։
ТАСС գործակալության հարցին, թե արդյոք Սոչիի գագաթնաժողովի օրակարգում կքննարկվի Փաշինյանի կողմից Լեռնային Ղարաբաղում ռուս խաղաղապահների մանդատի երկարաձգման մասին փաստաթուղթը մինչև 20 տարի ժամկետով ստորագրելու պատրաստակամությունը, փոխնախարարը հստակեցրել է, որ զորակազմը տեղակայվելու է այդ տարածաշրջանում՝ Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի եռակողմ հայտարարության համաձայն: «Այն հստակ մանդատ ունի՝ հինգ տարի։ Հինգ տարի դեռ չի անցել», – հավելել է նա։
Նշենք, որ նախօրեին ՔՊ համագումարի ժամանակ ՀՀ վարչապետ Նիկոլ Փաշինյանը հայտարարել էր ռուս խաղաղապահների մանդատը 10-20 տարով երկարաձգելու պատրաստակամության մասին՝ նշելով, որ ժամկետները պետք է որոշի Ռուսաստանը։
Նշենք, որ ՌԴ-Հայաստան-Ադրբեջան գագաթնաժողովը տեղի կունենա Սոչիում՝ երկուշաբթի: ՌԴ նախագահ Վլադիմիր Պուտինի մոտ նախատեսված են նաև առանձին երկկողմ հանդիպումներ Հայաստանի վարչապետի և Ադրբեջանի նախագահի հետ։
