Արցախի ԱԺ «ՀՅԴ» խմբակցության պատգամավոր, ԱԺ նախագահի տեղակալ Վահրամ Բալայանի ստացած տեղեկություններով՝ Արցախի շփման գծում իրավիճակն այս պահին հանգիստ է։
Արցախցի պատգամավորին չի զարմացնում, որ ադրբեջանական կողմը դարձյալ սադրանքի է դիմել։ Նրա խոսքով՝ Ադրբեջանի ագրեսիվ վարքագիծը նոր չէ։
Վահրամ Բալայանն Armenia Today-ի հետ զրույցում նկատեց՝ Արցախյան 44-օրյա պատերազմից հետո Ադրբեջանը գտնում է, որ ինչ ուզենա, այն էլ կարող է ստանալ։
«Ադրբեջանն անընդհատ նոր պահանջներ է դնում Հայաստանի առջև։ Վերջին շրջանում հակառակորդ պետությունն ագրեսիվացել է նաև տեղեկատվական դաշտում, նորանոր սպառնալիքներ է հնչեցնում։ Ադրբեջանը փորձում է այս տարբերակով ճնշումներ գործադրել Հայաստանի վրա թե՛ տեղեկատվական տիրույթում, թե՛ ռազմի դաշտում»,- ընդգծեց ԱՀ ԱԺ փոխխոսնակը։
Նա շեշտեց, որ Հայաստանը կատարում է Ադրբեջանի պահանջները՝ զորակոչ չիրականացնելով և Արցախից հայկական ստորաբաժանումները դուրս բերելով։
Վահրամ Բալայանը չի բացառում, որ Ադրբեջանի և Հայաստանի միջև հնարավոր է կուլիսային պայմանավորվածություններ լինեն, որոնք կյանքի են կոչվում։
«Հնարավոր են երկկողմանի գրավոր կամ բանավոր պայմանավորվածություններ։ Ադրբեջանը, իրենց ձևակերպմամբ ասած, խոսում է միջանցքից, տարածքներից։ Նշում են, որ ինչ ցանկանան, այն էլ կստանան։ Իսկ մենք կոնկրետ որևէ հնարավոր պայմանավորվածությունից տեղյակ չենք»,- նշեց ԱՀ պատգամավորը։
Վահրամ Բալայանի կարծիքով՝ Ադրբեջանի շփման գիծը հատելու փորձերը կարող է պայմանավորված լինել նաև օգոստոսի 5-ին Սոչիում կայանալիք Պուտին-Էրդողան հանդիպմամբ։
«Չեմ բացառում, որ այսպես ճնշումներ գործադրեն հայկական կողմի վրա՝ ստանալով իրենց պահանջները․ ճնշումներ գործադրելու մեխանիզմն է գործում։ Կա նաև մեկ այլ տեսակետ, որ Ադրբեջանն Արցախում լարվածություն է ստեղծում ներքին լսարանի համար՝ փորձելով ցույց տալ, որ ի վիճակի են բոլոր հարցերը լուծելու և իրենց պահանջներն իրականացնելու»,- ասաց պատգամավորը՝ հավելելով, որ Արցախն իր ունեցած հնարավորություններով փորձում է դիմակայել այս ամենին։
Հիշեցնենք, որ օգոստոսի 1-ին՝ ժամը 09:00-ից սկսած, Արցախի Հանրապետության հյուսիսային և հյուսիս-արևմտյան սահմանագոտու մի շարք հատվածներում ադրբեջանական ստորաբաժանումները դիմել են սադրանքի՝ կատարելով շփման գիծը հատելու փորձեր, որոնք կասեցվել են ՊԲ ստորաբաժանումների ուժերով:
Ադրբեջանական ստորաբաժանումների կողմից ձեռնարկված սադրանքի հետևանքով վիրավորում է ստացել ՊԲ զինծառայող Ալբերտ Վլադիկի Բախշիյանը։ Վիրավոր զինծառայողի վիճակը գնահատվում է բավարար:
ԱՀ ՊՆ-ի հաղորդմամբ՝ Արցախի շփման գծում կայուն լարվածությունը դեռ պահպանվում է։
