Խորհրդարանական ընդդիմության ձևավորած «Դիմադրություն» շարժումը ՀՀ ԱԺ «Քաղաքացիական պայմանագիր» խմբակցության պատգամավոր Վիգեն Խաչատրյանը որպես այդպիսին շարժում չի համարում։
Նրա համոզմամբ՝ ընդդիմությունն ավելի շուտ խաբեությամբ է զբաղված, և նրանց պայքարի նպատակը Հայաստանն ու Արցախը չեն, այլ ցանկանում են Ռոբերտ Քոչարյանին պատասխանատվությունից ազատել։ ՔՊ պատգամավորի խոսքով՝ այն ճգնաժամը, որում հայտնվել են Հայաստանն ու Արցախը, Սերժ Սարգսյանի և Ռոբերտ Քոչարյանի վարած սխալ քաղաքականության հետևանքն է։
«Ռոբերտ Քոչարյանն ու Սերժ Սարգսյանը պետք է ընդունեն, որ իրենց վարած քաղաքականությունը երկիրը տարել է պատերազմի։ Ռոբերտ Քոչարյանի, Սերժ Սարգսյանի չտես քաղաքականության արդյունքում հայտնվեցինք կոտրած տաշտակի առջև»,- Armenia Today-ի հետ զրույցում նշեց իշխանական պատգամավորը՝ հավելելով, որ նախկին նախագահները փոխարենը շտկեն սխալները, հակառակ գործողությունն են կատարում՝ փորձելով ռևանշի դիմել և նորից իշխանության գալ։
Անդրադառնալով ընդդիմության այն պահանջին, թե իշխանությունը պետք է հայտարարի, որ Արցախը չի լինելու Ադրբեջանի կազմում՝ պատգամավորը մատնանշեց, որ այդ արտահայտությունը նշանակում է բանակցությունների տապալում։
Նա ընդգծեց, որ Սերժ Սարգսյանի ու Ռոբերտ Քոչարյանի իշխանություններն են վաղուց Արցախն Ադրբեջանի մաս ճանաչել։
