Երևանի ընդհանուր իրավասության քրեական դատարանի Ավանի նստավայրում ավարտվել է ԲՀԿ առաջնորդ Գագիկ Ծառուկյանի կալանավորման միջնորդության քննությունը և որոշումը կհրապարակվի այսօր, լրագրողներին հայտնել է նրա փաստաբան Երեմ Սարգսյանը։
Նիստից հետո Ծառուկյանի պաշտպանները հայտարարել են, որ ներկայացված մեղադրանքն ամբողջությամբ «փուչ է, իսկ իրավապահների գործողություններում առկա են բազմաթիվ ակնհայտ ապօրինություններ»։
Ըստ պաշտպանական կողմի՝ մեղադրանքի հիմքում դրված է այն թեզը, թե իբր Ծառուկյանը խարդախությամբ հափշտակել է Իրանի Իսլամական Հանրապետության մի քանի քաղաքացիների գումարներն ու կատարել փողերի լվացում։
Սարգսյանը հստակեցրել է, որ խնդրո առարկա գումարները վերադարձնելու պարտավորությունը, ըստ ստորագրված փաստաթղթերի, սահմանված է մինչև 2026 թվականը, ուստի քրեական վարույթն օգտագործվում է որպես «շանտաժի գործիք»։
Նա պարզաբանել է, որ դատավարությունը տեղի է ունենում նաև Իրանում, որտեղ դատարանը իրանցի գործարարի պնդումները համարել է անհիմն։
«Մենք դատարանում Իրանի Իսլամական Հանրապետության դատարանի վերջնական որոշումով հիմնավորեցինք, որ նույն այս գործընթացը նրանք սկսել են նաև Իրանում, և տեղի դատարանն արձանագրել է, որ որևէ հանցագործություն չկա. սրանք զուտ քաղաքացիաիրավական, գործարար հարաբերություններ են։ Իրանի իրավասու մարմիններն արձանագրել են, որ այդ քաղաքացիների հայտարարությունների հիմնական մասը չի համապատասխանում իրականությանը»,- նշել է Սարգսյանը։
Պաշտպանները տարակուսանք են հայտնել, որ ընկերության գույքի հափշտակության մասին խոսող իրավապահները հաշվի չեն առնում, որ այդ գույքը շարունակում է պատկանել նույն ընկերությանը, որի 50% սեփականատերը հենց իրանցի գործարարն է։
«Նման փուչ մեղադրանք այսպիսի գործով դժվար էր պատկերացնել։ Մեղադրանքից քարը քարին չի թողնվել»,- հավելել է պաշտպան Էմին Խաչատրյանը։
Անդրադառնալով գործընթացի իրավական կողմին՝ փաստաբանները ներկայացրել են իրադարձությունների ժամանակագրությունը, որը, նրանց գնահատմամբ, փաստում է քաղաքական հետապնդման մասին։
2026 թվականի հունիսի 9-ին՝ ընտրություններից հետո, Ծառուկյանը գործերով պետք է մեկներ արտերկիր, սակայն սահմանին նրան արգելել էին՝ կիրառելով բացակայելու արգելք։
Պաշտպանները բողոքարկել էին այդ որոշումը՝ նշելով, որ Ծառուկյանը հանդիսացել է պատգամավորի թեկնածու և օժտված է եղել անձեռնմխելիությամբ, ուստի առանց ԿԸՀ-ի թույլտվության մեղադրանքն ապօրինի էր։
«Դատախազը բավարարեց մեր բողոքը և հունիսի 23-ին արձանագրեց, որ մեղադրանքն ապօրինի է։ Սակայն ո՛չ քննիչը, ո՛չ դատախազությունը մինչև հուլիսի 6-ը այդ որոշումը չեն ներկայացրել և սահմանափակումը չեն հանել։ Այսինքն՝ Ծառուկյանին ապօրինի պահել են երկրում միայն այն բանի համար, որ հուլիսի 6-ին նրան կարողանան ձերբակալել։ Սա վկայում է, որ գործընթացը զուտ իրավական չէ»,- պարզաբանել է պաշտպանական կողմը։
Փաստաբանների պնդմամբ՝ տարիներ շարունակ դանդաղ ընթացող քննությունը մեկուկես օրվա մեջ վերածվել է «հրատապ քննության»՝ միայն Ծառուկյանին դատարան բերելու և կալանքի որոշում ստանալու նպատակով։
Թեև ձևավորվել է քննչական խումբ, սակայն օբյեկտիվ իրականությունը բացահայտելուն ուղղված անհրաժեշտ քայլերը միտումնավոր չեն արվում։
Փաստաբանները հայտարարել են, որ պահանջում են առերեսումներ իրականացնել մի շարք անձանց հետ՝ իրացնելու իրենց հակընդդեմ հայցը։
«Ծառուկյանն էլ, մենք էլ պահանջում էինք առերեսումներ իրականացնել մի շարք անձանց, այդ թվում՝ Իրանի քաղաքացիների հետ, որպեսզի իրացնենք մեր հակընդդեմ հարցման իրավունքը։ Սակայն ժամանակ չլինելու պատրվակով դա չի արվել, թեև քննչական խումբը կարող էր դա անել հաշված ժամերի ընթացքում»,- ասել են փաստաբանները՝ նշելով, որ դատախազությունն այժմ փորձում է դատարանում տպավորություն ստեղծել, թե դեռ նախնական փուլ է և ժամանակ է պետք բազմակողմանի քննության համար։
Պաշտպանները եզրափակել են, որ Ծառուկյանի դեմ իրականացվող քաղաքական հետապնդումների ֆոնին միանգամից ակտիվացել են նաև հին՝ դեռևս 2019-2020 թվականներին հարուցված այլ վարույթները, ինչն ինքնին խոսուն փաստ է։
Ավելի վաղ փաստաբանները պնդել էին, որ հակառակ կողմը չի կատարել իր խոստումները և խարդախություն է թույլ տվել։ Սակայն, ըստ նրա, փոխանակ հայկական կողմին տուժող ճանաչելու, քննությունը տուժող է ճանաչել փաստացի իրանական կողմին։
