Իրավապահ մարմինները խուզարկում են «Բարգավաճ Հայաստան» կուսակցության առաջնորդ Գագիկ Ծառուկյանի տունն ու նրան փոխկապակցված որոշ ձեռնարկություններ, հայտնել է կուսակցության անդամ Արման Աբովյանը։
Աբովյանը ուղիղ եթերով Ծառուկյանի՝ Առինջ գյուղում գտնվող առանձնատան մոտից հայտնել է, որ առայժմ ներս չեն թողնում փաստաբաններին, ինչը նա որակել է որպես կոպտագույն խախտում։ Նա նաև հավելել է, որ տարածքում աշխատում են դրոններ, որոնք, ըստ երևույթին, պատկանում են ուժային կառույցներին։
«Մինչ այս պահը տունը շրջապատված է ավտոմատավոր մարդկանցով։ Իրենց համազգեստի վրա ԱԱԾ է գրված, մի խոսքով՝ նաև առայժմ չեն թողնում, որ մտնեն փաստաբանները, կոպտագո՛ւյն խախտում, դե ինչի՞ց ենք խոսում։ Կոպտագույն խախտում է, բայց դե շատ լավ հասկանում ենք, չէ՞, թե հիմա ինչ իրավիճակ է։ Վերևում դրոններ են աշխատում, ըստ երևույթին՝ ուժայինների դրոններն են»,- նշել է նա։
Կուսակցության խոսնակ Իվետա Տոնոյանի տվյալներով՝ ուժային կառույցների լայնածավալ օպերատիվ գործողություններն սկսվել են վաղ առավոտյան՝ ժամը 07:15-ից, Սահմանադրական դատարանի որոշումից հետո։
Խուզարկությունների պահին Ծառուկյանը և նրա ընտանիքի անդամները, այդ թվում՝ մայրը՝ Ռոզա Ծառուկյանը, տանն են գտնվել։ Ծառուկյանի փաստաբաններն արդեն ներկա են քննչական գործողությունների իրականացմանը։
Տոնոյանը նշել է, որ իրավապահ մարմինները շտապել են և սկսել խուզարկությունները՝ առանց լուսաբացին սպասելու։ Նա տեղի ունեցողը որակել է որպես «բոլոր հնարավոր միջոցներով Ծառուկյանի նկատմամբ ճնշում գործադրելու փորձ»։
Աբովյանի տվյալներով՝ իրավապահները մտել են նաև Ծառուկյանին պատկանող կամ նրա հետ կապ ունեցող ձեռնարկությունների շենքեր: Նա հավելել է, որ տեղեկությունները դեռևս նախնական են ու սահմանափակ, և հստակ հայտնի չէ, թե կոնկրետ ո՞ր քրեական գործի շրջանակներում են իրականացվում այս գործողությունները։
«Որոշ տվյալներով՝ Ծառուկյանին պատկանող այլ վայրեր են մտել, խոսքը «կոնյաչնիի» (Երևանի կոնյակի և գինու կոմբինատ-AT), «Մուլտնի Ուելնեսի», «Օլիմպավանի» մասին է։ Ցաքուցրիվ ինֆորմացիա է գալիս։ Տեղյակ չենք՝ ինչ գործի շրջանակում է տեղի ունենում այս իրավիճակը»,- հայտնել է նա։
Ավելի ուշ Քննչական կոմիտեից Armenia Today-ին հաստատել են Ծառուկյանի տանը քննչական գործողությունների իրականացումը։
«Քրեական վարույթի շրջանակում կատարվում են անհրաժեշտ քննչական և վարութային գործողություններ»,- հայտնել են գերատեսչությունից։
ՔԿ-ից այլ մանրամասներ չեն հայտնել՝ նշելով, որ ավելի ուշ հանդես կգան պաշտոնական հաղորդագրությամբ։
Ավելի ուշ ՔԿ մամուլի խոսնակ Կիմա Ավդալյանն Armenia Today-ին հստակեցրել է, որ գերատեսչությունում քննվող մեկ տասնյակից ավելի քրեական վարույթների շրջանակում Ծառուկյանին առնչվող 70-ից ավելի հասցեում կատարվում են միաժամանակյա խուզարկություններ։
«Արարատցեմետ» գործարանի գլխավոր տնօրենի ժ/պ Արտյոմ Պողոսյանը լրատվամիջոցներին պատմել է, որ իրավապահները միանգամից գրոհելով, նույնիսկ անվտանգության աշխատակիցներին վախեցնելով ու ֆիզիկական ուժ գործադրելով ներխուժել են գործարան։
«Սեփական տարածք մտնելուց պետք է ներկայանալ, բայց՝ չէ՛, ապօրինի ձևով վախեցնելով, էլի եմ ասում, ոմանց վրա ֆիզիկական ուժ գործադրելով, ներխուժել են տարածք, այնուհետև մոտեցել են վարչական շենքին»,- շեշտել է նա։
Պողոսյանը մտավախություն է հայտնել, որ գործարանի՝ այսօր այլևս չարտադրվող տեսակի սարքերը վթարային կերպով անջատելու պատճառով հնարավոր է դրանք շարքից դուրս են եկել ու հետագա աշխատանքը հարցականի տակ է։
Երևանի կոնյակի և գինու կոմբինատի կոմերցիոն տնօրեն Արմեն Զաքարյանը հայտնել է, որ իրավապահները վաղ առավոտյան գործարանի մուտքն արգելափակել են։ Նա նշել է, որ աշխատակիցներին ուղարկել են տուն, քանի որ մինչ աշխատատանքի սկիզբն արդեն օպերատիվ քննչական աշխատանքներ են սկսվել։
«Մենք դինամիկ աշխատող կազմակերպություն ենք, ունենք բազմաթիվ պայմանագրեր արտասահմանյան գործընկերների հետ, ունենք պլանավորված արտահանումներ ու ներմուծումներ։ Այժմ աշխատանքը պարալիզացված է»,- նշել է նա։
«Մուլտի Տաբակ» ընկերության տնօրեն Ջուլիետա Մարգարյանն իր հերթին լրատվամիջոցներին հայտնել է ընթացող խուզարկության մասին։ Նա պատմել է, որ իրավապահները տարածք են ժամանել մոտավորապես ժամը 7:30-ին։
Նրանք, առանց ներկայանալու, բոլոր պահակներին խնդրել են հեռանալ ու սկսել են քննչական գործողությունները։
Մարգարյանը նշել է, որ շենքում ո՛չ ընկերության աշխատակիցներ, ո՛չ էլ փաստաբաններ չկան,
քանի որ երեք ամիս է՝ իրենք հարկադիր պարապուրդի մեջ են։
«Մուլտի Ուելնես»-ը նույնպես հայտարարել է խուզարկությունների մասին՝ նշելով, որ իրենց համակարգիչներից տվյալներ են առգրավել։
Ընկերության ֆինանսական տնօրեն Կարապետ Գրիգորյանը ԶԼՄ-ներին ասել է, որ ոչ ոքի թույլ չեն տալիս մտնել շենք՝ բացի ադմինից ու տնօրենից։ Գրիգորյանի խոսքով՝ խուզարկությունը համատեղ վարում են ՊԵԿ-ն ու ՔԿ-ն։
«Բոլոր սենյակները մտնում են, համակարիչներից ինֆորմացիա են հանում։ Բայց դրանք մի քանի օր առաջ մենք արդեն տրամադրել ենք օպերատից խմբերին», - ասաց նա։
Նա նշել է, որ դրսում գտնվում է ավելի քան 200 աշխատակից, ինչպես նաև հաճախորդներ, որոնք չեն կարողանում մուտք գործել շենք։
Թարմացված է՝ 06.07.2026 | 13:00
