Չինաստանն Իսրայելին և մյուս շահագրգիռ կողմերին կոչ է արել գործել՝ առաջնորդվելով ԱՄՆ-ի և Իրանի միջև ձեռք բերված պայմանավորվածություններով, գրում է ՏԱՍՍ-ը։
Ճեպազրույցի ընթացքում համապատասխան հայտարարությամբ է հանդես եկել ՉԺՀ արտաքին գործերի նախարարության պաշտոնական ներկայացուցիչ Լին Ցզյանը։
«Այս պատասխանատու պահին բոլոր շահագրգիռ կողմերը, այդ թվում՝ Իսրայելը, պետք է գործեն՝ ելնելով տարածաշրջանում խաղաղության և կայունության շահերից։ Անհրաժեշտ է քայլեր ձեռնարկել, որոնք կնպաստեն առաջին փուլի պայմանավորվածությունների իրագործմանն ու երկրորդ փուլի շուրջ բանակցությունների առաջմղմանը, այլ ոչ թե այնպիսի գործողություններ, որոնք կխոչընդոտեն այդ գործընթացին»,- նշել է նա։
Դիվանագետն ընդգծել է նաև Չինաստանի պատրաստակամությունը՝ «շարունակելու կիրառել իր ազդեցությունն ու համագործակցել միջազգային հանրության հետ՝ ջանքեր գործադրելով Մերձավոր Արևելքում հարատև խաղաղության և կայունության հասնելու համար»։
ԱՄՆ նախագահ Դոնալդ Թրամփը և Իրանի փոխարտգործնախարար Քազեմ Ղարիբ-Աբադին կիրակի օրը հաստատել էին փոխըմբռնման հուշագրի ավարտը, որը նախատեսված է ստորագրել Շվեյցարիայում՝ հունիսի 19-ին։ Իրանի արտաքին գործերի նախարար Աբբաս Արաղչիի խոսքով՝ Իրանի և ԱՄՆ-ի միջև հուշագիրը ներառում է ռազմական գործողությունների անհապաղ դադարեցում բոլոր ճակատներում, այդ թվում՝ Լիբանանում։
Իսրայելի ծայրահեղ աջակողմյան ազգային անվտանգության նախարար Իթամար Բեն-Գվիրը հայտարարել է8, որ ԱՄՆ-Իրան համաձայնագիրը ոչինչ չի պարտավորեցնում Իսրայելին։
