Երևանի պետական համալսարանի (ԵՊՀ) արտասահմանյան գրականության ամբիոնը, որը գլխավորում է քաղաքագետ Անուշ Սեդրակյանը, նախատեսվում է լուծարել։
Մամուլն այս որոշումը կապում է ԵՊՀ հոգաբարձուների խորհրդի նախագահ, պաշտպանության նախարար Սուրեն Պապիկյանի գործոնի և խորհրդարանական ընտրություններին ընդդիմադիր «Միասնության թևեր» կուսակցության կազմում Սեդրակյանի մասնակցության հետ, մինչդեռ համալսարանը հերքում է քաղաքական ենթատեքստն ու փոփոխությունը պայմանավորում ցածր ուսումնական ծանրաբեռնվածությամբ:
«Հրապարակ»-ի թերթի աղբյուրի պնդմամբ՝ որոշումը կայացրել է անձամբ ԵՊՀ հոգաբարձուների խորհրդի նախագահ, պաշտպանության նախարար Սուրեն Պապիկյանն այն բանից հետո, երբ Սեդրակյանն ընդգրկվել է նախկին Մարդու իրավունթների պաշտպան Արման Թաթոյանի «Միասնության թևեր» կուսակցության պատգամավորության թեկնածուների ցուցակում։
Երևանի պետական համալսարանից (ԵՊՀ) հակադարձել են որոշման քաղաքական ենթատեքստի առկայությունը։
Բուհում պնդում են, որ կառուցվածքային փոփոխությունները դեռևս 2021–2022 թվականներին մեկնարկած բարեփոխումների մաս են կազմում և կապված չեն առանձին անձանց կամ ընթացիկ քաղաքական գործընթացների հետ:
Համալսարանում նաև մատնանշել են ավելի քան տասն ամբիոնների խոշորացումն ու միավորումը և լուծարման որոշումը պայմանավորել ցածր ուսումնական ծանրաբեռնվածությամբ՝ 2,5 դրույքով։ Ամբիոնի միակ մագիստրոսական ծրագրում սովորում է չորս ուսանող՝ հումանիտար մագիստրոսական ծրագրերի համար ԵՊՀ-ում սահմանված նվազագույն տասը հոգու շեմի դեպքում։
ԵՊՀ-ում պնդում են նաև, որ 2026 թվականի փետրվարին Սեդրակյանի թեկնածությունը չի համապատասխանել ամբիոնի վարիչի պաշտոնի համար հայտարարված մրցույթի պահանջներին, այդ թվում՝ գիտական հրապարակումներին վերաբերող չափանիշներին։ Չնայած դրան՝ ղեկավարությունը նրան նշանակել է պաշտոնակատար մինչև ուսումնական տարվա ավարտը՝ կրթական գործընթացը չխաթարելու համար
Համալսարանում հակադարձել են նաև ամբիոնի վերակազմավորման և Եվրոպական լեզուների ու հաղորդակցության ֆակուլտետի նախկին դեկան Գևորգ Բարսեղյանի ազատման միջև կապը։ ԵՊՀ-ից պնդել են, որ հունվարին նա պաշտոնը լքել է սեփական դիմումի համաձայն:
ԵՊՀ-ից հայտնել են, որ այս գործընթացը շարունակական է լինելու, և առաջիկայում նախատեսվում են նաև այլ ամբիոնների կամ ստորաբաժանումների խոշորացումներ։
Առանձին դասավանդողների կամ ԵՊՀ աշխատողների հետ պայմանագրերի խզման հետ կապված ուսհաստատությունից հայտնել են, որ պայմանագրերի երկարաձգման կամ չերկարաձգման վերաբերյալ որոշումները կայացվում են ակադեմիական, կազմակերպական և իրավական չափանիշներով և չեն կարող դիտարկվել քաղաքական հայացքների կամ հանրային ակտիվության համատեքստում։
2025 թվականի վերջին կալանավորվել էր «Հայրենիք» կուսակցության գլխավոր քարտուղար Խաչիկ Գալստյանը, ով ԵՊՀ նախկին դասախոս է։
Հունիսի 12-ին ձերբակալվել էր ԵՊՀ դասախոս Ալեն Ղևոնդյանը, ում մեղադրանք էր առաջադրվել սահմանադրական կարգը տապալելու բռնի կոչերի համար։ Ղևոնդյանին արգելվել էր հրապարակումներ անելն ու հավաքի վայրեր այցելելը, ինչպես նաև սոցիալական ցանցի միջոցներով հաղորդակցվելը:
