Ազգային ժողովի «Հայաստան» դաշինքի պատգամավոր Սեյրան Օհանյանին Մարտի 1-ի գործով հաջորդ նիստին դատարան բերման ենթարկելու որոշում է կայացվել։
Հակակոռուպցիոն դատարանի խոսնակ Արմինե Նովրուզյանն Armenia Today-ին հայտնել է, որ դատարանի որոշումը կապված է Մարտի 1-ի գործով այսօր տեղի է ունեցած նիստի հետ, որին Օհանյանը չի ներկայացել։
Նա հստակեցրել է, որ այս հանգամանքը հաշվի առնելով՝ դատարանը որոշում է կայացրել Օհանյանին հարկադրաբար ներկայացնել հաջորդ դատական նիստին, որը տեղի կունենա հունիսի 19-ին՝ ժամը 10։00-ին։
2008-ի մարտի 1-ի լույս 2-ի գիշերը Երևանում ցույցեր և բախումներ էին տեղի ունեցել փետրվարի 19-ի նախագահական ընտրություններից հետո, զոհվել էր 10 մարդ, վիրավորվել էին հարյուրավոր ոստիկաններ, զինծառայողներ և քաղաքացիական անձինք։ Օհանյանն այդ ժամանակ զբաղեցնում էր պաշտպանության նախարարի պաշտոնը։
2018-ին Հայաստանում իշխանափոխությունից հետո գործը նոր փուլով էր քննվել: Օհանյանից բացի գործով անցնում են նաև ՀՀ նախկին նախագահ Ռոբերտ Քոչարյանը, նախկին փոխվարչապետ Արմեն Գևորգյանը, ԶՈւ գլխավոր շտաբի նախկին պետ Յուրի Խաչատուրովը։ Ավելի ուշ վարույթով քրեական հետապնդում էր հարուցվել նաև ՀՀ նախկին ոստիկանապետ Վալերիյ Օսիպյանի և Երևանի նախկին փոխոստիկանապետ Ռոբերտ Մելքոնյանին նկատմամբ՝ հատուկ միջոցների գործադրմամբ ցույց ցրելու մեղադրանքով։
Կարդացեք նաև՝
«Մարտի 1»-ի գործով նոր մեղադրանքներ կառաջադրվեն
