Իջևանցի վարորդներն ավտոմեքենաներին «Քաղաքացիական պայմանագիր» կուսակցության նախընտրական խորհրդանիշ «սրտիկի» պատկերը փակցնելու դիմաց օրական 5000 դրամ են ստացել, հայտնել է «Հրապարակ» օրաթերթը։
Ըստ թերթի՝ այդպիսի մեքենաների թիվն առավել մեծ էր մինչև հունիսի 7-ի խորհրդարանական ընտրությունների օրը, իսկ քվեարկության ավարտից հետո վարորդների մի մասն արդեն հեռացրել է դրանք։
ՔՊ-ի նախընտրական պաստառները վնասելու համար ուժային կառույցները մի շարք քաղաքացիների նկատմամբ նախընտրական շրջանում հետապնդումներ են իրականացրել։ ՔՊ-ի նախընտրական պաստառ պատռելուց հետո մայիսի 15-ին ձերբակալվել էր հոգեկան առողջության հետ խնդիր ունեցող քաղաքացի։ Նախընտրական քարոզչությանը խոչընդոտելու գործով ձերբակալված Արմեն Հովհաննիսյանին մայիսի 16-ին «Նուբարաշեն» հոգեկան առողջության պահպանման կենտրոնում կախված վիճակում էին գտել։ Մեկ այլ դեպքով մայիսի 15-ին Մետրոպոլիտենում ՔՊ-ի քարոզչական պաստառին ֆլոմաստերով ինչ-որ բան գրելու համար կնոջ էին ձերբակալել։
Հունիսի 7-ին ՀՀ-ում անցկացվել էին ԱԺ ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%)։ Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
Կարդացեք նաև՝
Ի՞նչ խախտումներ են արձանագրվել ընտրատեղամասերում
