Սպիտակ տունը կարծում է, որ Իրանի կողմից ԱՄՆ-ի հետ գործարքի թարմացված առաջարկն «անբավարար է գործարք ապահովելու համար», հայտնում է Axios-ը՝ հղում անելով աղբյուրներին:
Անանուն ամերիկացի պաշտոնյաների խոսքով՝ ԱՄՆ նախագահ Դոնալդ Թրամփը ցանկանում է պատերազմն ավարտող գործարք, բայց քննարկում է ռազմական գործողությունների վերսկսման հնարավորությունը, քանի որ Իրանը մերժել է իր պահանջներից շատերը և հրաժարվել էական զիջումների գնալ միջուկային ծրագրի հարցում:
Աղբյուրները հայտնել են, որ Թրամփը մայիսի 19-ին հանդիպում կունենա ազգային անվտանգության թիմի հետ՝ Իրանի դեմ ռազմական գործողությունները քննարկելու նպատակով: ԱՄՆ բարձրաստիճան պաշտոնյան հրատարակությանը հայտնել է, որ եթե Իրանը չփոխի իր դիրքորոշումը, ԱՄՆ-ն ստիպված կլինի շարունակել բանակցությունները «ռումբերով»:
Աղբյուրների խոսքով՝ Իրանի նոր առաջարկը, որն ԱՄՆ-ին է փոխանցվել մայիսի 17-ի երեկոյան՝ պակիստանցի միջնորդների միջոցով, պարունակում է միայն խորհրդանշական բարելավումներ նախորդ տարբերակի համեմատ:
Մասնավորապես նշվում է, որ առաջարկը ներառում է Իրանի կողմից միջուկային զենքի մշակումից հրաժարվելու վերաբերյալ հավելյալ հայտարարություններ, սակայն չի պարունակում ուրանի հարստացումը դադարեցնելու կամ բարձր հարստացված ուրանի առկա պաշարները փոխանցելու հստակ պարտավորություններ։
Մերձավոր Արևելքում իրավիճակը սրվել էր ԱՄՆ-ի և Իսրայելի կողմից փետրվարին Իրանի վրա հարձակվելու ֆոնին։ Ապրիլի 7-ին ԱՄՆ նախագահը հայտարարել էր երկշաբաթյա երկկողմանի հրադադարի մասին, իսկ ապրիլի 21-ին միակողմանիորեն երկարաձգել այն։
