ԱՄՆ նախագահ Դոնալդ Թրամփը հայտարարել է, որ Թեհրանն անձնական շփումների ժամանակ պատրաստակամություն է հայտնել հրաժարվել միջուկային զենքից, սակայն հրապարակավ շարունակում է պնդել ուրանի հարստացման իր իրավունքը, հայտնում է ՏԱՍՍ-ը։
The New York Post-ին տված հարցազրույցում Թրամփը նշել է, որ իրանական կողմը «դեմ առ դեմ» հանդիպումներում խոստանում է ամբողջությամբ լուծարել միջուկային զինանոցը, մինչդեռ մամուլի համար արվող հայտարարություններում պահպանում է նախկին հռետորաբանությունը։
Սպիտակ տան ղեկավարը հավելել է, որ վստահ չէ՝ արդյոք Թեհրանն անկե՞ղծ է իր խոստումներում և նշել է, որ պետք է սպասել հետագա զարգացումներին։
Թրամփն ապրիլի 8-ին հայտարարել էր Իրանի հետ երկշաբաթյա փոխադարձ հրադադարի մասին։ Սպիտակ տան ղեկավարի խոսքով՝ կողմերը լուծել են գրեթե բոլոր վիճելի հարցերը, այդ թվում՝ որոշում է կայացվել Հորմուզի նեղուցը բացելու վերաբերյալ։ Թեհրանն, իր հերթին, համաձայնել է դադարեցնել «պաշտպանական հարձակումները», եթե Իսլամական հանրապետության ուղղությամբ հարվածներ չհասցվեն։
Ապրիլի 11-ին Իրանի և ԱՄՆ-ի միջև բանակցություններ են նախատեսված Պակիստանում։
