Խորհրդարանական ընտրություններից երկու ամիս առաջ քաղաքական հռետորաբանության սրացման նոր փուլ է սկսվել. հրապարակային ելույթներում փաստարկներին փոխարինելու են եկել անձնական վիրավորանքները։
Վերջին շրջանում հանրային քննարկումների կենտրոնում է վարչապետ Նիկոլ Փաշինյանի խոսույթը, որտեղ ընդդիմախոսների հասցեին հնչում են կոշտ ու վիրավորական արտահայտություններ։
Փաշինյանը, արձագանքելով գործարար Սամվել Կարապետյանի «Ուժեղ Հայաստանի» ներկայացուցիչների թեզին, թե վարչապետը վախենում է իրենց ուժից և դրա համար արհեստական խոչընդոտներ է ստեղծում, ասել է. «Վախենում եմ մինչև տարվա վերջ միլիարդատիրոջից դառնաս բոմժ»։
«Ուժեղ Հայաստան» կուսակցության խորհրդի նախագահ Նարեկ Կարապետյանը, արձագանքելով, ամոթանք է տվել՝ ասելով. «բա սա վարչապետի խոսո՞ւյթ է» և պատասխանել, որ նման մարդը «հոգով է բոմժ»։
Armenia Today-ը մայրաքաղաքի փողոցներում հարցում է անցկացրել՝ պարզելու, թե քաղաքացիներն արդյոք նորմա՞լ են համարում նման պահվածքը։
Հարցման մասնակիցների մեծ մասը դեմ է արտահայտվել Փաշինյանի բառապաշարին՝ նշելով, որ երկրի առաջին դեմքի կողմից նման խոսույթը տհաճություն է առաջացնում։
«Այդ լեքսիկոնը, որով խոսում է, նախևառաջ իրեն է վերաբերում։ Եթե վիրավորում է ժողովրդին, ինքն իրեն է վիրավորում»,- ասել է քաղաքացիներից մեկը։
Մեկ այլ քաղաքացի վարչապետի խոսքերը որակել է որպես երկրի ղեկավարին ոչ հարիր պահվածք և տակտի բացակայություն։
«Իսկ քաղաքականությանն, առհասարակ, չեմ հետևում, տհաճություն է պատճառում»,- նշել է նա։
Քաղաքացիներից մեկի խոսքով՝ վարչապետի կողմնակից է, սակայն սխալ է համարում նրա կողմից նման արտահայտությունները։
«Եթե նման բաներ է ասել, ճիշտ չի արել»,- հավելել է նա:
Մեկ այլ քաղաքացի հայտնել է, որ չի լսել վերջին կոշտ հայտարարւթյոգնները, բայց անկախ դրանից՝ համոզված է, որ «վարչապետը լավ տղա է, լավ բաներ է անում»։
Ազգային ժողովն ապրիլի 7-ի արտահերթ նիստում երկրորդ ընթերցմամբ և ամբողջությամբ ընդունել էր Ընտրական օրենսգրքում փոփոխություններ կատարելու նախագիծը, որով կարգելվի կուսակցությունների դաշինքի անվան մեջ անձնանուններ կիրառել։ ՀՀ ընտրական օրենսգրքում փոփոխություններ և լրացումներ կատարելու մասին օրենքի նախագիծը խորհրդարան էր ներկայացվել ապրիլի 6-ին: Օրինագիծը մշակվել էր «Քաղաքացիական պայմանագիր» կուսակցության պատգամավորների կողմից։
«Ուժեղ Հայաստան» կուսակցությունից նույն օրը հայտարարել էին, որ նախագիծն «Ուժեղ Հայաստան Սամվել Կարապետյանի հետ» դաշինքի դեմ է՝ հաշվի առնելով, որ անվան մեջ անձնանուն կա։
Մանրամասները՝ տեսանյութում։
