Արամ Ա կաթողիկոսն այսօր այցելել է Լիբանանի նախագահ Ժոզեֆ Աունին և դատապարտել Իսրայելի գործողությունները, հայտնում է Մեծի Տանն Կիլիկիո կաթողիկոսությունը։
«Լիբանանի տարածքային ամբողջականության և ինքնիշխանության պահպանումը, պետության հեղինակության ամրացումը, բանակի ներկայությունը Լիբանանի բոլոր շրջաններում և ազգային միասնականության ամուր պահպանումը՝ մանավանդ ճակատագրական այս պահին, առաջնահերթություն և հրամայական է»,- ասել է կաթողիկոսը։
Արամ Ա-ն իր զորակցությունն է հայտնել Լիբանանի նախագահին և ընդգծել, որ պետության և համայնքների կողմից ցուցաբերած հատուկ հոգածությունը գնահատելի է:
«Իսրայելի մուտքը հարավային Լիբանան, շարունակվող ռմբակոծումները և սպանությունները պետք է խստորեն դատապարտվեն: Այս քայլերն անհամատեղելի են միջազգային օրենքների հետ: Միջազգային հանրությունը և Լիբանանի բարեկամ երկրները չպետք է անտարբեր մնան այդ վտանգավոր գործողությունների նկատմամբ»,- ասել է նա:
Կաթողիկոսի խոսքով՝ գաղթականների հարցը պետք է համընդհանուր, ծրագրավորված և հետևողական լուծում ունենա, որպեսզի նրանք կարողանան վերադառնալ իրենց բնակավայրեր։
Human Rights Watch իրավապաշտպան կազմակերպությունը հայտնել էր, որ Իսրայելը մարտի սկզբին հարավային Լիբանանի բնակելի շրջաններում կիրառել էր սպիտակ ֆոսֆոր։ Մարտի 24-ին տվյալներով՝ Լիբանանի վրա Իսրայելի հարձակումների հետևանքով զոհերի թիվը հասել էր 1072-ի, վիրավորվել էր 2966 մարդ։
Մարտի 31-ին Իսրայելի պաշտպանության նախարար Իսրայել Կացը հայտարարել էր, որ մտադիր են Լիբանանի հարավում վերահսկողություն հաստատել մինչև Էլ-Լիտանի գետը և հավելել, որ վերահսկողության հաստատումն Իսրայելի հյուսիսային շրջանների անվտանգության ապահովման նպատակով ստեղծվող անվտանգության գոտու շրջանակում է։
