ՀՀ նախագահ Վահագն Խաչատուրյանը ՍԴ դատավորի պաշտոնում առաջարկել է ԱԺ «Քաղաքացիական պայմանագիր» խմբակցության պատգամավոր Վլադիմիր Վարդանյանի թեկնածությունը, տեղեկանում ենք ԱԺ կայքից։
«ՀՀ սահմանադրության 166-րդ հոդվածի 1-ին և «Ազգային ժողովի կանոնակարգ» սահմանադրական օրենքի 141-րդ հոդվածի 4-րդ մասերի համաձայն` ՀՀ նախագահը Սահմանադրական դատարանի դատավորի պաշտոնում ընտրելու համար առաջադրել է Վարդանյանի թեկնածությունը»,- ասված է նախագահի որոշման մեջ:
Ավելի ուշ Վարդանյանը հայտնել է, որ դադարեցրել է անդամակցությունը «Քաղաքացիական պայմանագիր» կուսակցությանը և Սահմանադրական դատարանի դատավորի պաշտոնում ընտրվելու դեպքում դադարեցնելու է նաև խորհրդարանական գործունեությունը։ Նա նշել է, որ դատավորի պաշտոնը և΄ պատվաբեր, և΄ չափազանց պատասխանատու է, այդ իսկ պատճառով սա իր կյանքի ամենահեշտ որոշումներից չէր։
«Բարձր առաջարկին համաձայնվել եմ այն գիտակցությամբ, որ թե΄ մասնագիտական և թե΄ ակադեմիական գործունեության ընթացքում ձեռք բերված գիտելիքներս պետք է առավել արդյունավետ ծառայեցնել մեր երկրի ժողովրդավարական արժեքների պահպանման և զարգացման գործին»,- նշել է նա։
Սահմանադրական դատարանի դատավոր կարող է ընտրվել միայն 40 տարին լրացած, ՀՀ քաղաքացի հանդիսացող, բարձր մասնագիտական և բարոյական որակներ և առնվազն 15 տարվա մասնագիտական աշխատանքային փորձ ունեցող իրավաբանը։
