Իրանը նոր հոգևոր Գերագույն առաջնորդ է ընտրել Սեյեդ Մոջթաբա Խամենեիին: Նա կփոխարինի իր հորը՝ սպանված այաթոլլա Ալի Խամենեիին, հայտնում է BBC-ն:
Իրանի փորձագետների խորհուրդը մարտի 8-ին տեղեկացրել էր, որ Իրանի սուրբ համակարգի երրորդ գերագույն առաջնորդ է նշանակվել 56-ամյա Մոջթաբա Խամենեին:
Ի տարբերություն իր հոր՝ Մոջթաբան երկար տարիներ մնում էր ստվերում, նշել է ԶԼՄ-ն։ Նա երբեք պետական պաշտոններ չի զբաղեցրել, հանդես չի եկել հանրային ելույթներով և չի տվել հարցազրույցներ, իսկ բաց աղբյուրներում հրապարակվել են միայն նրա փոքրաթիվ լուսանկարները և տեսագրությունները։
Այնուամենայնիվ, տարիների ընթացքում, ըստ պարբերականի, սկսել են շրջանառվել լուրեր, համաձայն որոնց նա քաղաքական դաշտում նշանակալի ազդեցություն ունի։
ԱՄՆ դիվանագիտական ներկայացուցիչները WikiLeaks-ում 2000-ականների վերջին նրան նկարագրում էին որպես մարդ, ում իշխող շրջանակներում համարում են «հմուտ և հստակ»:
Փորձագետների խորհուրդը մարտի 8-ի երեկոյան հայտնել էր, որ Իրանը նոր Գերագույն առաջնորդ է ընտրել՝ առանց նրա անունը հրապարակելու՝ միայն նշելով, որ ազգանունը կմնա նույնը: Որոշ լրատվամիջոցներ ավելի վաղ հաղորդել էին, որ մահացած հոգևոր առաջնորդի որդին համարվում է պաշտոնի ամենահավանական թեկնածուն։ Սակայն մարտի 7-ին տեղեկություններ էին տարածվել, որ նա հնարավոր է՝ վիրավորվել է Իրանում տեղի ունեցած ռմբակոծության ժամանակ։
Իրանի դեմ ԱՄՆ-ի ու Իսրայելի սկսած պատերազմից առաջին օրերին՝ մարտի 1-ին էր հաղորդվել այաթոլլահ Խամենեիի մահվան մասին:
