ԱՄՆ նախագահ Դոնալդ Թրամփի մերձավոր խորհրդականները նրան խորհուրդ են տվել չզանգել ՌԴ առաջնորդ Վլադիմիր Պուտինին, քանի դեռ Մոսկվան չի համաձայնել Ուկրաինայում հրադադարի ռեժիմին, հայտնել է NBC-ն։
Թրամփը հայտարարել է, որ մտադիր է այս շաբաթ խոսել Պուտինի հետ, սակայն, ըստ հեռուստաալիքի, վարչակազմի պաշտոնյաները նախազգուշացրել են հանրապետականին, որ նման կոչը «լավ գաղափար չէ» առանց Մոսկվայի պաշտոնական համաձայնության։
Սպիտակ տուն Թրամփի վերադարձից հետո նախագահները երկու անգամ խոսել են՝ փետրվարի 12-ին և մարտի 18-ին։
Երկրորդ զրույցի ընթացքում քննարկվել է Ռուսաստանի և Ուկրաինայի միջև հակամարտության կարգավորումը։ Կրեմլը հայտնել էր, որ Պուտինը համաձայնել է 30 օրով հրաժարվել էներգետիկ ենթակառուցվածքներին հարվածներ հասցնելուց, սակայն դրանից հետո երկու կողմերն էլ բազմիցս միմյանց մեղադրել են զինադադարի պայմանները խախտելու մեջ։
Ռուսաստանի և Ուկրաինայի միջև բանակցությունները վերջին օրերին փակուղի են մտել, և Մոսկվան մերժել է հակամարտությունը դադարեցնելու ԱՄՆ-ի ներկայիս առաջարկները, քանի որ ըստ ռոուսական կողմի՝ դրանք չեն լուծում պատերազմի հանգեցրած արմատական խնդիրները:
Միևնույն ժամանակ՝ Ուկրաինայի նախագահ Վլադիմիր Զելենսկին նախանշել է բանակցությունների «կարմիր գծեր»՝ ընդգծելով, ըստ որոնց Ուկրաինան չի ճանաչում գրավյալ տարածքները որպես ռուսական և մտադիր չէ կրճատել իր զինված ուժերը։
Մարտի 24-ին Թրամփը հայտնել էր, որ Էր Ռիադում ռուսական կողմի հետ ընթացող բանակցություններում քննարկվում են Ուկրաինայում տարածքային հարցերն ու հնարավոր սահմանազատման գծերը, Ուկրաինայում ատոմակայանների նկատմամբ ԱՄՆ-ի հնարավոր վերահսկողությունը։
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ և ԱՄՆ նախագաների միջև փետրվարի 12-ին կայացած հեռախոսազրույցից հետո։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Մարտի 12-ին ԱՄՆ պետքարտուղար Մարկո Ռուբիոն Ռուսաստանին կոչ էր արել 30-օրյա հրադադար հաստատել Ուկրաինայում։ Մարտի 11-ին Կիևը համաձայնել էր ընդունել ժամանակավոր հրադադարի մասին ԱՄՆ-ի առաջարկը: Ռուսաստանը համաձայնել էր ռազմական գործողությունները դադարեցնելու առաջարկներին այն պայմանով, որ դրանք պետք է հանգեցնեն երկարաժամկետ խաղաղության:
