Սաուդյան Արաբիայում ընթացող բանակցություններում ԱՄՆ-ի և Ուկրաինայի պատվիրակությունները քննարկել են Կիևի կողմից հնարավոր տարածքային զիջումների հարցը, РБК-ի փոխանցմամբ՝ այս մասին հայտարարել է ԱՄՆ պետքարտուղար Մարկո Ռուբիոն՝ մեկնաբանելով Ջիդդայում կայացած հանդիպման արդյունքները։
«Մենք նման խոսակցություններ ենք ունեցել», – մամուլի ասուլիսի ժամանակ պատասխանել է Ռուբիոն հարցին, թե բանակցությունների ընթացքում տարածքային զիջումներ քննարկվե՞լ են, թե՝ ոչ:
Ռուբիոն նշել է, որ Ուկրաինայի պատվիրակության հետ բանակցությունների հիմնական մասը նվիրված էր նրան, թե ինչպիսին կլինի բանակցային գործընթացը:
Մարտի 11-ին Կիևը համաձայնել էր ընդունել ժամանակավոր հրադադարի մասին ԱՄՆ-ի առաջարկը: ԱՄՆ-ն վերսկսել է հետախուզական տվյալների փոխանակումն Ուկրաինայի հետ:
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի միջև փետրվարի 12-ին կայացած հեռախոսազրույցից հետո։ Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Փետրվարի 18-ին ԶԼՄ-ները հայտնել էին, որ ԱՄՆ-ն ցանկանում է գրեթե լիակատար վերահսկողություն ունենալ ուկրաինական ռեսուրսների և դրանցից ստացված եկամուտների կեսի վրա։
Փետրվարի 28-ին Ուկրաինայի նախագահ Վլադիմիր Զելենսկին ժամանել էր Վաշինգտոն՝ հանքարդյունաբերության գործարք կնքելու համար։ Նրա հանդիպումը Թրամփի հետ վերածվել էր վիճաբանության՝ հենց լրատվամիջոցների առջև, և գործարքը ձախողվել էր:
