Ազգերի լիգա․ Հայաստանի հավաքականը պարտվել է Վրաստանի ընտրանուն

ՈւԵՖԱ-ի Ազգերի լիգայի խաղարկության անցումային փլեյ-օֆֆ փուլում Հայաստանի ֆուտբոլի ազգային հավաքականը Վազգեն Սարգսյանի անվան «Հանրապետական» մարզադաշտում 0։3 հաշվով պարտվել է Վրաստանի ընտրանուն։

Երրորդ բաց թողնված գնդակից հետո ֆուտբոլասերները վանկարկել են՝ «Մելիքբեկյան, հեռացի՛ր»։

Պատասխան հանդիպումը տեղի կունենա մարտի 23-ին` ժամը 18:00-ին, Թբիլիսիում։

Մարզադաշտում խաղին հետևում էին ՀՀ և Վրաստանի վարչապետներ Նիկոլ Փաշինյանն ու Իրակլի Կոբախիձեն, ինչպես նաև երկու երկրների Պաշտպանության նախարարներ Իրակլի Չիկովանին և Սուրեն Պապիկյանը, Վրաստանի արտաքին գործերի նախարար Մակա Բոչորիշվիլին, Թբիլիսիի քաղաքապետ Կախա Կալաձեն, Երևանի քաղաքապետ Տիգրան Ավինյանը։

2024 թվականի հոկտեմբերին, ՈՒԵՖԱ-ի Ազգերի լիգայի Հյուսիսային Մակեդոնիայի հետ խաղում Հայաստանի հավաքականի պարտությունից հետո, որին հաջորդել էր հավաքականի գլխավոր մարզիչ Ալեքսանդր Պետրակովի պաշտոնանկությունը, ֆան-շարժումների ներկայացուցիչները պահանջել էին Մելիքբեկյանի հրաժարականը: ՀՖՖ-ն հոկտեմբերի 14-ին հայտարարել էր, որ ՀՖՖ նախագահի հրաժարականի հարց չի քննարկվում: Ինքը՝ Մելիքբեկյանը, հոկտեմբերի 21-ին հայտարարել էր, որ չի պատրաստվում հրաժարական տալ։

Հունվարի 30-ին երկրպագուները ՀՖՖ-ին մեղադրել էին ազգային հավաքականի խաղերին իրենց ներկայությունը կանխելու մեջ։

Փետրվարի 17-ին հայտնի էր դարձել, որ «Այաքսի» և Հունաստանի ազգային հավաքականի նախկին գլխավոր մարզիչ Ջոն վան’տ Սխիպը կգլխավորի Հայաստանի ազգային հավաքականը։