ԿԳՄՍՆ ղեկավար Ժաննա Անդրեասյանը կառավարության ապրիլի 30-ի նիստում մանրամասնել է 2029 թվականի սեպտեմբեր-հոկտեմբեր ամիսներին ՀՀ -ում Ֆուտբոլի 2029 թ. երիտասարդների աշխարհի առաջնությունը (ԵԱ Մ20)։
Առաջնությունը կանցկացվի Հայաստանում և Վրաստանում, հայտարարել էր ՀՖՖ-ն։
Նախարարի տեղեկությամբ՝ ԵԱ Մ20-ի շրջանակում տեղի կունենա 30 խաղ, որից 20-ը՝ Երևանում, իսկ 10-ը՝ Իջևանում և Վանաձորում։
«Այս պահին դեռևս ծրագիրը նախնական է, հնարավոր է՝ որոշ փոփոխությունների ենթարկվի»,- ասել է նախարարը։
Նրա խոսքով՝ «ՖԻՖԱ»-ից կստանան առաջիկա անելիքների ճանապարհային քարտեզ, և նախատեսվում է որ երկիրը կընդունի 100 000 այցելու։
Նպատակ է դրված վերակառուցել Վանաձորի մարզադաշտը՝ համապատասխանեցնելով այն միջազգային ամենաբարձր՝ 4-րդ կարգի չափանիշներին:
ՈՒԵՖԱ-ի կամ ՖԻՖԱ-ի դասակարգմամբ 4-րդ կարգը (Category 4) մարզադաշտերին տրվող ամենաբարձր պրոֆեսիոնալ կարգն է։
Սա նշանակում է, որ մարզադաշտը համապատասխանում է միջազգային ամենախիստ չափանիշներին և իրավունք ունի հյուրընկալել խոշորագույն մրցաշարերի եզրափակիչ փուլերը։
Անդրեասյանը տեղեկացրել է նաև, որ առաջիկայում «ՖԻՖԱ»-ի ներկայացուցիչները կայցելեն Հայաստան:
ՀՀ վարչապետ Նիկոլ Փաշինյանն իր հերթին հայտարարել է, որ Հայաստանն ու Վրաստանը կստեղծեն համատեղ աշխատանքային խումբ՝ առաջնության կազմակերպչական հարցերը համակարգելու նպատակով։
Նա նաև հայտնել է, որ Իջևանում պետք է նոր մարզադաշտ կառուցվի, իսկ Երևանը պատրաստ է հյուրընկալել խաղերը։
Վարչապետը շեշտել է, որ գործող բոլոր ենթակառուցվածքները՝ սննդի կետեր, հյուրանոցներ, փողոցներ և այլն, նույնպես պետք է պատրաստ լինեն մասշտաբային միջոցառմանը։ «Եթե այդքան մարդ մտնի Իջևան, մի օրում սնունդը կարող է վերջանալ»,- կատակել է նա:
ՀՖՖ-ն հայտնել էր, որ Հայաստանի և Վրաստանի ֆուտբոլի ֆեդերացիաների նախագահներ Արմեն Մելիքբեկյանն ու Լևան Կոբիաշվիլին հանդիպել են ՖԻՖԱ-ի նախագահ Ջաննի Ինֆանտինոյին, քննարկել առաջիկա քայլերը և համատեղ աշխատանքային օրակարգի մանրամասները՝ երաշխավորելու առաջնության անթերի ընթացքը։
