Երևանի դատարանը որոշել է, որ «Անկախության մեր ճանապարհը» վավերագրական ֆիլմի օգտագործման իրավունքը պատկանում է Հայաստանի հանրային հեռուստաընկերությանը՝ սահմանափակելով ռեժիսոր Տիգրան Պասկևիչյանի կողմից ֆիլմի հետագա ցուցադրությունները, տեղեկանում ենք Kinopress.am-ից։
Դատարանի որոշմամբ՝ Պասկևիչյանը չի կարող առանց համապատասխան համաձայնության կազմակերպել ֆիլմի ցուցադրություններ կամ որևէ այլ ձևով տարածել:
Նշվում է, որ ֆիլմն ստեղծվել է Հայաստանի անկախության հռչակագրի 30-ամյակի առթիվ և փոխանցվել Հանրային հեռուստաընկերությանը պայմանավորվածությունների հիման վրա: Ըստ փաստաթղթերի՝ ֆիլմի ստեղծումից հետո դրա օգտագործման բացառիկ իրավունքները փոխանցվել են հեռուստաընկերությանը, որը նաև ֆինանսավորել էր նախագիծը:
Ֆիլմն ստեղծումից հետո մի քանի անգամ ցուցադրվել է տարբեր հարթակներում: Ըստ հիմնավորման՝ այդ ցուցադրությունները կազմակերպվել են Պասկևիչյանի կողմից՝ առանց լրացուցիչ համաձայնեցման, ինչն էլ վեճի առարկա է դարձել։
Հեռուստաընկերությունը պնդել է, որ նման ցուցադրությունները խախտում են իր՝ որպես ֆիլմի օգտագործման իրավունք ունեցող կողմի լիազորությունները, քանի որ ֆիլմը չի հրապարակվել լայն հասանելիությամբ, և դրա տարածումը պետք է իրականացվի միայն հեռուստաընկերության որոշմամբ:
Պասկևիչյանն, իր հերթին, նշել է, որ պայմանագիրն ստորագրելիս համոզված էր, որ Հանրային հեռուստաընկերությունն այն սփռելու է եթերում և տեղադրելու է YouTube ալիքում: Ռեժիսորը նաև ընդգծել է, որ Հանրային հեռուստաընկերությունը ֆիլմը ցուցադրելու տասնյակ առիթներ է ունեցել, սակայն չի սփռել այն և չի տեղադրել իր YouTube-յան ալիքում:
Դատական գործընթացն սկսվել էր 2025 թվականի հուլիսին, վերջնական որոշումը հրապարակվել էր 2026-ի մարտի 27-ին։
