Երևանի «Դալմա մոլ» առևտրի կենտրոնի ավտոկայանատեղիում հարձակում է տեղի ունեցել հանրային գործիչ, պատմաբան Միհրան Հակոբյանի վրա, հայտնել է փաստաբան Ռուբեն Մելիքյանը։
Ըստ փաստաբանի՝ այդ անձինք դիմակավորված էին և հարձակվել են թիկունքից։ Հակոբյանն ստացել է մարմնական վնասվածքներ և այժմ տեղափոխվում է «Իզմիրլյան» ԲԿ, գրել է նա։
«Վստահ եմ, որ այս հարձակումը տեղի չէր ունենա, եթե իրավապահները բացահայտած լինեին 2021թ. Միհրանի տան առջև նռնակ նետելու հանցանքը»,- նշել է Մելիքյանը։
ՆԳՆ-ն ժամը 15։10-ի սահմաններում ահազանգ է ստացել «Իզմիրլյան ԲԿ»-ից Հակոբյանի՝ ծեծի հետևանքով ստացած վնասվածքներով իրենց մոտ տեղափոխվելու մասին, Armenia Today-ին հայտնել են նախարարության մամուլի ծառայությունից։
Գերատեսչությունից հավելել են, որ դեպքի հանգամանքները պարզվում են Մալաթիայի ոստիկանության բաժնում:
2021 թվականի հունիսի 22-ի առավոտյան նռնակ էին գցել (հավանաբար ձայնային) հանրային գործչի մեքենայի տակ, որը կայանված էր իր տան դիմաց։
