Վրաստանն առաջարկել է Հայաստանի ու Ադրբեջանի միջև խաղաղության հաստատումից հետո տարածաշրջանի զարգացումը դիտարկել որպես միասնական տարածք, տեղեկանում ենք ադրբեջանական լրատվամիջոցներից։
«Մենք բոլորս պետք է աջակցենք միմյանց այն հարցերում, որոնք կարևոր են Հայաստանի, Վրաստանի և Ադրբեջանի համար։ Սա ներառում է ինքնիշխանության ամրապնդումը և մեր ժողովուրդների բարեկեցության բարելավումը»,- ճեպազրույցի ժամանակ նշել է Վրաստանի խորհրդարանի խոսնակ Շալվա Պապուաշվիլին։
Արտաքին գործերի նախարար Մակա Բոճորիշվիլին, իր հերթին, հույս է հայտնել, որ Հարավային Կովկասի երկրների միջև համագործակցությունը կշարունակվի, և դա զգալի արդյունքներ կտա երեք երկրի և ամբողջ տարածաշրջանի համար։
Նա հիշեցրել է, որ Հայաստանի, Վրաստանի և Ադրբեջանի ԱԳ նախարարների տեղակալների առաջին եռակողմ հանդիպումը տեղի էր ունեցել Թբիլիսիում այս տարվա ապրիլի 17-ին։ Նախարարը նշել է, որ հանդիպումը նպատակ ուներ հիմք դնել տարածաշրջանի երկրների միջև փոխշահավետ համագործակցության համար։
Թբիլիսիում կայացել էր ՀՀ ԱԳ նախարար Արարատ Միրզոյանի և Բոճորիշվիլիի առանձնազրույցը, որի օրակարգում էին ինչպես երկկողմ գործընկերության զարգացման, այնպես էլ տարածաշրջանային հարցեր:
