Տրանսպորտային ուղիների ապաշրջափակումը կարող է փոխել Հարավային Կովկասի լոգիստիկ քարտեզը․ վրացի փորձագետ

Վրաստանից Ադրբեջան բեռնափոխադրումները վերջին 10 տարվա ընթացքում նվազել են 40%-ով, իսկ Ադրբեջանից Վրաստան՝ 15%-ով, նոյեմբերի 4-ին Երևանում կայացած «Օրբելի 2025» միջազգային ֆորումի ժամանակ հայտարարել է Վրաստանի տրանսպորտային միջանցքի հետազոտական ​​կենտրոնի տնօրեն Պաատա Ցագարեիշվիլին։

Ցագարեիշվիլիի խոսքով՝ սա վկայում է այն մասին, որ Եվրոպայից Կենտրոնական Ասիա բեռնափոխադրումներն զգալիորեն նվազել են։ Մասնագետը նշել է, որ Բաքու-Թբիլիսի-Կարս երկաթուղու տարեկան հզորությունը կազմում է 5 միլիոն տոննա։

«Սակայն, 2023 թվականին այս ներուժի միայն 11%-ն է օգտագործվել»,- նշել է նա։

Ցագարեիշվիլին նաև կարծիք է հայտնել, որ Հայաստանի, Ադրբեջանի և Թուրքիայի միջև տրանսպորտային ուղիների ապաշրջափակումը կարող է փոխել Հարավային Կովկասի լոգիստիկ քարտեզը։

Մասնագետի խոսքով՝ նոր երթուղիների բացումից հետո Վրաստանը կարող է կորցնել մինչև 2 միլիոն տոննա տարանցիկ բեռ, որը կազմում է Միջին միջանցքով անցնող ընդհանուր բեռնափոխադրումների մոտավորապես 15-20%-ը։

Ցագարեիշվիլին նաև ընդգծել է, որ Ռուսաստանից Ադրբեջան երկաթուղային բեռնափոխադրումների ծավալն 9-ը անգամ ավելի մեծ է, քան հակառակ ուղղությամբ։