Մայր Աթոռ Սուրբ Էջմիածնի դիվանապետ Արշակ արքեպիսկոպոս Խաչատրյանը հայտարարել է, որ համացանցում տարածվող անպարկեշտ բովանդակությամբ տեսանյութերը, իբրև իր մասնակցությամբ, զրպարտություն և հերյուրանք են՝ ուղղված իր և եկեղեցու դեմ:
Նա դատապարտել է իր և իր ընտանիքի հետ նման նյութեր կապելու փորձերը՝ նշելով, որ բնական է համարում «իշխող քաղաքական ուժին սպասարկող լրատվամիջոցների» կողմից նման զրպարտչական պատմությունների տարածումը: Արքեպիսկոպոսի խոսքով՝ դա իշխանության սովորական ոճի մի մասն է՝ վարկաբեկել հոգևորականներին, թուլացնել եկեղեցին և պառակտում սերմանել հասարակության մեջ։
«Մարդկանցից շատերն ինձ խորհուրդ էին տալիս արագ արձագանքել և հերքել: Ցանկանում եմ արձանագրել, որ ուժերի գերլարումով իսկ, լուրջ դեմքով չեմ կարող լծվել հորինվածքների ու զրպարտությունների հերքմանը։ Խելամիտ եմ համարում արհամարհել: Հետևաբար՝ շահագրգիռ անձանց հրապարակավ «հղում եմ» իմ արհամարանքն ու քմծիծաղը»,- գրել է Խաչատրյանը։
Նա նաև առաջարկել է այդ տեսանյութերը հրապարակել «Հայկական ժամանակ» օրաթերթում և «Քաղաքացիական պայմանագիր» կուսակցության ներկայացուցիչների էջերում՝ որպես սեփական ճաշակի և հակումների վկայություն:
«Խնայեք ձեր էներգիան, պարոնայք և տիկնայք, այն ձեզ պետք է լինելու պատասխանատվության ժամին, երբ ամբողջապես կբացահայտվեն «ձեր երեսների հակառակ կողմերը»»,- հավելել է արքեպիսկոպոսը։
Armenian WikiLeaks տելեգրամյան ալիքի տվյալներով, որտեղ տեսանյութն առաջինն է հայտնվել, պնդում է արվում, թե արքեպիսկոպոսը սեռական կապի մեջ է մտել իր քեռակնոջ հետ: Ավելի վաղ վարչապետ Նիկոլ Փաշինյանը, չմանրամասնելով, թե ում է դիմում, սոցիալական ցանցերում գրել էր. «Սրբազան, գնա շարունակիր քեռուդ կնգան դոմփել, ինձ հետ ի՞նչ գործ ունես»:
«Իրազեկ քաղաքացիների միավորումը» ՀՀ գլխավոր դատախազություն է ուղարկել հանցագործության վերաբերյալ հաղորդում՝ ենթադրաբար Արշակ սրբազանի անձնական կյանքի գաղտնիությունը կոպիտ կերպով խախտելու դեպքի առթիվ։
