Վարչապետ Նիկոլ Փաշինյանը ճեպազրույցում մեկնաբանել է TRIPP-ի վերաբերյալ համաձայնագրի մանրամասները, Հայ Առաքելական եկեղեցու (ՀԱԵ) ղեկավարության դեմ արշավը շարունակելու մտադրությունները, ինչպես նաև Ռուսաստանի նախագահ Վլադիմիր Պուտինի հետ հանդիպում ունենալու ծրագրերը։
Նա վերահաստատել է իր դիրքորոշումը, որ «խաղաղությունը հաստատված է», միևնույն ժամանակ շեշտել՝ «խաղաղությունը պետք է ավելի ինստիտուցիոնալ դառնա»։
Առաջիկայում փաստաթղթերը կհրապարակվեն
Մեկնաբանելով այն հարցը, թե ինչու չեն հրապարակվում Վաշինգտոնում ստորագրված համաձայնագրերը, այդ թվում՝ TRIPP նախագծի շրջանակներում Սյունիքի մարզով անցնող ճանապարհին վերաբերողները՝ Փաշինյանը խոստացել է, որ կառավարությունը պատրաստ է հրապարակել Միացյալ Նահանգների հետ ստորագրված համաձայնագրերը՝ ամերիկյան կողմի հետ համապատասխան համաձայնությունների հասնելուց հետո։
«Այդ հուշագիրը վերաբերում է խաղաղության խաչմերուկին, միջուկային էներգետիկայի ոլորտում համագործակցությանը, արհեստական ինտելեկտի ու բարձր տեխնոլոգիաների ոլորտում համագործակցությանը»,- ասել է նա։
TRIPP-ի մասով վարչապետը նշել է, որ աշխատանքային պայմանավորվածություն են ունեցել հրապարակելու միայն բովանդակությունը, բայց ոչ տեքստը։
«Բայց քանի որ հետաքրքրությունը հանրության շրջանում մեծանում է, կարծում եմ՝ առաջիկայում ամերիկյան գործընկերների հետ համաձայնություն ձեռք կբերենք և կհրապարակենք նաև այդ փաստաթղթերը»,- հավելել է նա։
Փաշինյանը հավաստիացրել է, որ փորձագետներն ու ԱԺ յուրաքանչյուր պատգամավոր կարող է ծանոթանալ տեքստի բովանդակությանը, որի մեջ, իր հավաստիացմամբ, գաղտնիք չկա։
Վարչապետը չի մեկնաբանել Armenia Today-ի հարցն այն մասին, թե TRIPP-ի շրջանակում հայկական կողմի՝ ճանապարհը վերահսկելու դեպքում ո՞վ է մաքսային ստուգում իրականացնելու՝ ԱՄՆ-ն, թե՞ ԱՄՆ-ի կողմից կարող է տրվել շվեցարական, ֆրանսիական, թուրքական, ճապոնական ընկերության, կամ հայ մաքսային աշխատակիցնե՞րը, թե՞ այլ երկրի մասնավոր կազմակերպության աշխատակիցներ։
Փաշինյանը ռիսկերի հետ կապված բոլոր մտավախություններն անվանել է «Կիկոսի մահը» և կրկնել է այն թեզը, որ եթե առաջարկները հիմնված լինեն հինգ սկզբունքի վրա (տարածքային ամբողջականություն, ինքնիշխանություն, իրավազորություն, սահմանների անխախտելիություն, փոխադարձություն), ապա համաձայն կլինի «Կիկոսի մահի» հետ։
Խաղաղության հաստատումը չի ենթադրում Երևանի ու Բաքվի միջև հարցերի վերացում
Երբ արձանագրում ենք, որ խաղաղություն է հաստատվել, չենք արձանագրում, որ կողմերն այլևս հարցեր չունեն, հայտարարել է Փաշինյանը։
«Միջպետական հարաբերությունների հաստատումը և զարգացումը դինամիկ պրոցես է. կողմերն ունեն իրենց համաձայնություններն ու անհամաձայնությունները»,- նշել է նա։
Կաթողիկոսին փոխարինելու Փաշինյանի ծրագրերը չեն փոխվել
ՀՀ վարչապետը ճեպազրույցի ժամանակ հայտնել է, որ եկեղեցու վերաբերյալ իր դիրքորոշումները որևէ փոփոխություն չեն կրել և չեն կարող կրել որևէ հանգամանքի ներքո։
«Կտրիճ Ներսիսյանը պետք է Վեհարանից հեռանա։ Վեհարանը պետք է ազատվի Կտրիճ Ներսիսյանից և պետք է ազատվի ՀԱԵ հետևորդների ջանքերով, որոնցից մեկն էլ ես եմ. ասել եմ՝ առաջնորդելու եմ այդ գործընթացը»,- ընդգծել է նա։
Կգա որոշում կայացնելու ժամանակը․ ԵՄ-ին ու ԵԱՏՄ-ին միաժամանակ անդամակցելու մասին
Հայաստանը չի կարող միաժամանակ անդամակցել ԵՄ-ին ու ԵԱՏՄ-ին, հայտարարել է Փաշինյանը։
«Երբ ընտրությունն անխուսափելի ու վերջնական լինի, կկայացնենք համապատասխան որոշում։ Ցանկացած սցենար հնարավոր է։ Դա կապված է նաև մեր ժողովրդի արտահայտած կամքի, ընթացիկ իրավիճակների, բանակցային գործընթացների, իրադրությունների, հնարավորությունների, այլընտրանքների վերլուծության արդյունքների և հեռանկարների հետ»,- ասել է նա։
Վարչապետը հավելել է, որ սեպտեմբերի վերջին նախատեսվում է այց Ռուսաստան, մինչ այդ Պեկինում շփումներ կունենա ՌԴ նախագահ Վլադիմիր Պուտինի հետ։
«Ուրախ եմ, որ ինձ սպասում են ՌԴ-ում, ես էլ միշտ սպասում եմ ՌԴ այցելեու հերթական հնարավորությանը»,- ընդգծել է նա։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի, որը պետք է Ադրբեջանը միացնի Նախիջևանին Հայաստանի հարավով և գտնվի ամերիկյան կոնսորցիումի կառավարման ներքո։
Օգոստոսի 12-ին ՀՀ ԱԳՆ-ն հրապարակել էր Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագիրը, որն օգոստոսի 9-ին Վաշինգտոնում նախաստորագրվել էր երկու երկրների արտգործնախարարներ Արարատ Միրզոյանի և Ջեյհուն Բայրամովի կողմից։
