Վերջին յոթ տարիների ընթացքում Հայաստանի դպրոցներում առաջին դասարանցիների թիվը նվազել է 4-5 հազարով, հայտնել է Երևանի պետական բժշկական համալսարանի ռեկտոր Արմեն Մուրադյանը։
Նրա խոսքով՝ եթե 2018 թվականին այս թիվը մոտ 39 հազար էր, ապա մինչև 2024 թվականը նվազել է մինչև շուրջ 34-35 հազարի։
«2018-ի սեպտեմբերին դպրոցները դիմավորել են մոտ 39 հազար առաջին դասարանցի, 2020-ին պաշտոնական հաղորդագրությամբ արձանագրվել է 36,161 առաջին դասարանցի, 2022-ի սեպտեմբերին նախնական գնահատականը շուրջ 40 հազար էր՝ մասամբ 2016-2017 ծնունդների ավելացման և որոշ ներգաղթի հաշվին, 2024-ի օգոստոսի 30-ի դրությամբ՝ էլեկտրոնային համակարգում նախնական 34 780 առաջին դասարանցի էր հայտագրված, այսինքն՝ 2018-ի շուրջ 39 հազարից տատանումներով շարժվելով՝ ցուցանիշը 2024-ին իջել է մոտ 34-35 հազարի»,- գրել է ռեկտորը։
Ըստ նրա՝ տատանումները հիմնականում պայմանավորված են ծնելիության «ալիքներով» (տարեցտարի փոփոխվող ծնունդներ), տարածաշրջանային միգրացիայով, տեղափոխություններով և այլ գործոններով։
Մուրադյանը նշել է նաև, որ առաջին դասարանցիների 60%-ը գերադասում է բարձրագույն կրթությունը, իսկ նրանց շրջանում բավականին մեծ մասը նախընտրում է բժշկական կրթությունը, որը շարունակում է մնալ շրջանավարտների ամենապահանջված ուղղություններից մեկը։
2023թ․ ընդունելության արդյունքների համաձայն՝ բուհ դիմորդների ամենապահանջված մասնագիտությունը «բուժական գործն» էր։ Ընդհանուր վարկանիշավորման տվյալներով՝ առաջին ընտրության մասնագիտությունների մեջ առողջապահական ուղղությունները (բժշկություն, ստոմատոլոգիա, դեղագործություն) առաջին տեղերում են:
