Միքայել արքեպիսկոպոս Աջապահյանի գործով մեղադրող կողմը դեռևս չի ձևակերպել, թե ե՞րբ և ինչպե՞ս է նա հնչեցրել իշխանությունը զավթելու կոչը, որը հիշատակվում է Շիրակի թեմի առաջնորդ Միքայել արքեպիսկոպոս Աջապահյանի քրեական գործում, լրագրողների հետ զրույցում հայտնել է փաստաբան Երեմ Սարգսյանը։
«Երբ հասանք այն կետին, որ հրապարակեցին կոնկրետ փաստաթուղթ, խնդրեցինք, որպեսզի կոչը ցույց տան, որովհետև այս ամենը կառուցված է այդ կոչի վրա, ասացին՝ հետո դրա մասին կասենք։ Նախաքննության, կալանքի և դատաքննության փուլում մինչև հիմա չեն ասել՝ այդ կոչը ե՞րբ է հնչել, ինչպե՞ս, բայց քննում են այդ գործում»,- ասել է Սարգսյանը։
Նա անդրադարձել է նաև գործի հարուցման գործընթացում թույլ տրված խախտումներին, չարաշահումներին։ Փաստաբանի խոսքով՝ քննությունը հնարավորություն չունի ներկայացնելու իրավական հակափաստարկներ պաշտպանության կողմի փաստարկներին։
Փաստաբան Մարինե Ֆարմանյանը հավելել է, որ գործի շրջանակներում պաշտպանությունը ներկայացրել է երկու փորձագիտական կարծիք՝ Նարինե Դիլբարյանի և Վանո Ասատրյանի։
«Մասնագետները կարծիք են տրամադրել, որ 2024թ․ և դրան հետևող տեսանյութերում որևէ կոչ չի պարունակվում։ Ընդհակառակը, դա պատմողական նախադասություն է և իր մեջ պարունակում է նախկին իրադրությունների վերաբերյալ պատմություն»,- նշել է նա։
Ֆարմանյանի խոսքով՝ նույնիսկ առանց մանրամասն լեզվաբանական վերլուծության ակնհայտ է, որ դա կոչ չէ։ Նա հիշեցրել է, որ Սահմանադրական դատարանի նախկին որոշման համաձայն՝ կոչը պետք է պարունակի իշխանությունների դեմ անօրինական գործողություններ կատարելու հրավեր։
Հունիսի վերջին երկու ամսով կալանավորվել էր արքեպիսկոպոս Աջապահյանը՝ իշխանությունը զավթելու հրապարակային կոչ անելու մեղադրանքով։
