Իրանի արտգործնախարար Աբբաս Արաղչին հայտարարել է, որ Թեհրանը պատրաստ է ստորագրել համաձայնագիր, որի միջոցով Իրանը միջուկային զենք չի ստանա։
«Մենք պատրաստ ենք ցանկացած համաձայնագրի, որը կկանխի Իրանի միջուկային զենքի ձեռքբերումը։ Սակայն եթե համաձայնագրի նպատակն Իրանին ատոմային էներգիայի խաղաղ օգտագործման իրավունքից զրկելն է, ապա այդպիսի համաձայնագրի պատրաստ չենք»,- Արաղչիի խոսքերը փոխանցում է ՏԱՍՍ-ը։
Միևնույն ժամանակ, Իրանի խորհրդարանի ազգային անվտանգության և արտաքին քաղաքականության հարցերի հանձնաժողովի անդամ Էբրահիմ Ռեզային երկրի ղեկավարությանը կոչ է արել դուրս գալ Միջուկային զենքի չտարածման պայմանագրից։
Մինչ հունիսի 13-ը՝ Իրանի դեմ իսրայելական գործողության մեկնարկը, Իրանը և ԱՄՆ-ն Թեհրանի միջուկային ծրագրի շուրջ անցկացրել էին բանակցությունների 5 փուլ։ Վեցերորդ փուլը, որը նախատեսված էր հունիսի 15-ին, չեղարկվել էր իսրայելական հարձակման մեկնարկից հետո։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ ՀՀ ԱԳՆ-ն դատապարտել էր Իսրայելի հարձակումն Իրանի վրա։
Կարդացեք նաև՝
Փորձագետները գնահատել են Հայաստանի հնարավոր քայլերը` Իսրայելի կողմից Իրանի վրա հարձակման ֆոնին
