«Հայաքվե» նախաձեռնությունը դիմել է դատախազություն՝ Հայ Առաքելական եկեղեցուն ուղղված վարչապետ Նիկոլ Փաշինյանի հայտարարությունների առնչությամբ։
Նախաձեռնության ղեկավար Ավետիք Չալաբյանը տեսաուղերձում ընդգծել է, որ վարչապետի հայտարարությունները վիրավորական բնույթ ունեն և անմիջականորեն միջամտում են եկեղեցու գործերին։ Նա նշել է, որ Սահմանադրությամբ երաշխավորվում է բոլոր կրոնական կազմակերպությունների ազատ գործունեությունը Հայաստանում, և պետությունը որևէ իրավունք չունի միջամտել նրանց ներքին գործերին։
Չալաբյանն ընդգծել է, որ Սահմանադրությունը Հայ առաքելական եկեղեցուն շնորհում է բացառիկ կարգավիճակ՝ որպես հայկական ինքնության հենասյուն, և պաշտոնյաներն իրավունք չունեն կատարել գործողություններ, որոնք չեն բխում նրանց լիազորություններից։ Չալաբյանի խոսքով՝ այս դրույթի խախտումը հավասարազոր է սահմանադրական կարգի տապալմանը։
Չալաբյանը դիմել է գլխավոր դատախազին՝ խնդրելով նախաձեռնության այս հայտարարությունն ընդունել որպես հանցագործության մասին հաղորդում, նախաձեռնել քրեական գործ՝ Փաշինյանի հայտարարությունների և սոցիալական ցանցերում գրառումների համապատասխանությունը Սահմանադրությանը քննելու նպատակով, ինչպես նաև դրանց համապատասխանությունը Քրեական օրենսգրքի 420-րդ հոդվածի (սահմանադրական կարգի տապալում) նախատեսվող պատժամիջոցներին։
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել»։ Մայիսի 30-ի առավոտյան վարչապետը մի շարք գրառումներով անդրադարձել էր հոգևորականների՝ իրեն ուղղված քննադատություններին, որոնք հնչել էին նրա հայտարարություններին ի պատասխան։ Փաշինյանը նաև ՀՀ իշխանություններին կոչ էր արել մասնակցել կաթողիկոսի ընտրություններին՝ պնդելով, որ կաթողիկոսի թեկանածուները պետք է բարեվարքության ստուգում անցնեն։
Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ՝ նշելով, որ նրանք, իբր, «չուլաններում կատարում են այլասերվածություններ և հավատավոր ժողովրդի ցասմանն անգամ չեն արժանանում»։ «Սրբազան պայքար» շարժման առաջնորդ, արքեպիսկոպոս Բագրատ Գալստանյանը Մայր Աթոռին կոչ էր արել դատական գործընթաց սկսել Փաշինյանի և նրա կնոջ կողմից հոգևորականների դեմ վիրավորական հրապարակումների կապակցությամբ։
Այսօր ավելի վաղ Մայր Աթոռը տեղեկացրել էր, որ կաթողիկոսը Շվեյցարիայում մասնակցում է «Կրոնական ազատություն․ հայկական հոգևոր, մշակութային և պատմական ժառանգության պահպանումն Արցախում» խորագրով միջազգային համաժողովին, որտեղ հանդես էր եկել ելույթով։
