ԱՄՆ-ն չի մասնակցի ՀԱՀ-ում կայանալիք Մեծ քսանյակի (G20) ֆորումներին, ԱՄՆ Կոնգրեսի սենատի արտաքին գործերի կոմիտեում լսումների ժամանակ հայտնել է ԱՄՆ պետքարտուղար, ԱՄՆ նախագահի ազգային անվտանգության հարցերով օգնականի ժամանակավոր պաշտոնակատար Մարկո Ռուբիոն։
«Որոշել ենք չմասնակցել G20-ի այս տարվա գագաթաժողովին, որն ընդունում է Հարավային Աֆրիկան, ո՛չ արտգործնախարարի, ո՛չ նախագահի մակարդակով»,- ասել է նա:
Ռուբիոյի խոսքով՝ այդ որոշումն արտացոլում է ինչպես Վաշինգտոնի և Պրետորիայի միջև հակասությունները, այնպես էլ ամերիկյան կողմի անհամաձայնությունը G20-ի օրակարգի ձևավորման հարցում ՀԱՀ-ի մոտեցման հետ:
Հարավային Աֆրիկայի կազմած օրակարգը «չի արտացոլում ԱՄՆ ներկայիս վարչակազմի առաջնահերթությունները», հայտարարել է ամերիկյան դիվանագիտության ղեկավարը:
Ինչպես մայիսի 14-ին հայտնել էր The Washington Post թերթը, Սպիտակ տան Ազգային անվտանգության խորհուրդը հանձնարարել էր ամերիկյան կառավարության կառույցներին դադարեցնել G20-ի հետ աշխատանքը, որն այս տարի միջոցառումներ է անցկացնում ՀԱՀ-ի տարածքում: Այս որոշումը, ինչպես հստակեցվել էր հրապարակման մեջ, կապված է նոյեմբերին Յոհանեսբուրգում կայանալիք G20-ի գագաթնաժողովը բոյկոտելու ԱՄՆ նախագահ Դոնալդ Թրամփի սպառնալիքների հետ՝ այն հաղորդագրությունների պատճառով, որ «ՀԱՀ-ի սպիտակամորթ բնակիչներից կառավարությունը նոր օրենքի համաձայն հող է խլում»:
