Իրավապահներն ավարտել են 2010 թվականին պարտադիր ժամկետային զինծառայողի ինքնասպանության դեպքի առթիվ նախաձեռնված հեռակա քրեական վարույթի նախաքննությունը և հեռակա վարույթ հարուցել հետախուզվողի նկատմամբ, հայտնել է ՔԿ-ն։
Այդ տարվա մարտի 15-ին ՊԲ զորամասի վերանորոգման վաշտի սպայական սենյակի հետնամասում հայտնաբերվել էր նույն զորամասի պարտադիր ժամկետային զինծառայող, շարքային Վ.Մ.-ի դին՝ պարանի միջոցով երկաթյա պտտաձողից կախված վիճակում:
ՔԿ-ն պարզել է, որ նախորդ օրը զորամասի պարտադիր ժամկետային զինծառայողներ Ա.Խ.-ն և Ն.Գ.-ն շարքային Վ.Մ.-ին ճնշելու, նրա պատիվն ու արժանապատվությունը ստորացնելու դիտավորությամբ վերջինիս կողմից խոստացված գումարը ժամանակին չվերադարձնելու համար հալածանքների էին ենթարկել նրան, ինչի հետևանքով Վ.Մ.-ն նույն օրը կախվելու եղանակով ինքնասպանություն էր գործել:
Ա.Խ.-ի նկատմամբ հարուցվել է հանրային քրեական հետապնդում՝ 18.04.2003 թվականին ընդունված Քրեական օրենսգրքի 359-րդ հոդվածի 3-րդ մասով (զինծառայողների փոխհարաբերությունների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում, պատժվում է ազատազրկմամբ՝ մինչև 8 տարի ժամկետով):
