Վճռաբեկ դատարանը մերժել է Երևանի «Հանրապետության» հրապարակում ադրբեջաներեն «Ղարաբաղ» երգող օտարերկրացիների մասնակցությամբ տեսանյութը տարածած Ղարիբ Բաբայանի գործով Գլխավոր դատախազի բողոքը վարույթ ընդունելը, հայտնել է փաստաբան Վադիմ Հայրապետյանը։
Նա հիշեցրել է, որ դատարանի՝ փետրվարի 2-ի որոշմամբ՝ Բաբայանի նկատմամբ կիրառվել էր այլընտրանքային խափանման միջոց՝ վարչական հսկողություն և որպես պարտականություն սահմանելով՝ դատարանն արգելել էր Բաբայանին սոցիալական ցանցերում, համացանցային հարթակներում, ծառայություններում կամ կայքերում հրապարակային կոչեր կատարել։
Մարտի 6-ին Վերաքննիչ քրեական դատարանը վերացրել էր Բաբայանի նկատմամբ ընտրված սահմանափակումները։
Հունվարի 30-ին Ֆեյսբուքում տարածվել էր Երևանում օտարերկրյա քաղաքացիների մասնակցությամբ երգելու տեսանյութ։ Հունվարի 31-ին ԱԱԾ-ն հայտնել էր, որ հրապարակում երգողներն Իրանի քաղաքացիներ են։ Փետրվարի 1-ին ԱԱԾ-ն Իրանի քաղաքացիների՝ տեսանյութը հրապարակած ՀԿ ղեկավարի նկատմամբ գործ հարուցելու մասին հաղորդում էր ներկայացրել ՔԿ։ Ավելի ուշ ՔԿ-ն հայտնել էր, որ ձերբակալվել է տեսանյութը տարածող արցախցի Բաբայանը։
Ըստ ՔԿ-ի՝ Բաբայանին ձերբակալել էին «Ղարաբաղ, ջան Ղարաբաղ» երգն ադրբեջաներենով երգելու տեսանյութը հրապարակելու և այդ միջոցով «ՀՀ իշխանությունների ու ՀՀ ոստիկանության ծառայողների նկատմամբ ատելություն, անհանդուրժողականություն և թշնամանք հրահրելուն ու քարոզելուն ուղղված հրապարակային խոսք» տարածելու մեղադրանքով։ Փետրվարի 2-ին Բաբայանին դատարանի դահլիճից ազատ էին արձակել՝ կիրառելով վարչական հսկողություն խափանման միջոցը, արգելելով հանդես գալ հրապարակային խոսքով։
