Ադրբեջանցիները հատել են շուրջ 60 հեկտար անտառ Հայաստանի Սյունիքի մարզի Շիկահող արգելոցի օկուպացված տարածքում՝ դիրքեր, ինժեներական կառույցներ և ճանապարհներ կառուցելու համար, հայտնել է «Հետք»-ը՝ հղում անելով Planet և Google Earth պատկերներից վերցված արբանյակային քարտեզներին։
Շիկահողի արգելոցի հարավ-արևելյան հատվածից հակառակորդի ներխուժումն ակներև է 2023-ին, երբ հատվել են Շիկահողի արգելոցի ստորին փեշերը՝ հայ-ադրբեջանական սահմանի հայկական կողմից բլրի վրա դիրքավորվելու համար, գրել է լրատվականը։
Անտառով անցնող ճանապարհները կտրված են ռազմական դիրքերի համար հարմար տարածքները մաքրելու և Ներքին Հանդ գյուղի ստորին հատվածներ հասնելու համար։ 2022 թվականի արբանյակային պատկերներում այս տարածքները դեռևս ծածկված էին անտառով։
Կայքը նշում է, որ Ադրբեջանի կողմից կառուցված ճանապարհների միջին լայնությունը 7-8 մետր է։ Սակայն հատումները չեն իրականացվել հստակ եզրերով. ճանապարհների երկայնքով նոսրացվել են նաև անտառամերձ տարածքները։ Համաձայն «Հետք»-ի՝ հատվել են հիմնականում կաղնու և բոխու ձևավորված ծառուտները։
Անտառագետ Այսեր Ղազարյանն ասել է, որ բացի վերոնշալ անտառներից, ավերվել են նաև թփուտային տարածքներ։ Ընդհանուր առմամբ՝ հողային աշխատանքներ են իրականացվել 90 հեկտարի վրա, որից անտառածածկ տարածքները կազմում են շուրջ 60 հեկտար: Այս պարագայում առնվազն 14 000-16 000 մ³ փայտանյութ է կտրվել Շիկահողի արգելոցի տարածքից։
«Հետքն» առանձնացրել է ադրբեջանական ներխուժման հետևանքով հատված անտառների մի քանի ուղղություն։
«Շիկահող» պետական արգելոցը Սյունիքի մարզի Խուստուփ լեռան հարավ-արևելյան և Մեղրու լեռնաշթղայի հյուսիսարևելյան լանջերին է՝ Ծավ և Շիկահող գետերի վերին ավազանում։ Այն ստեղծվել է Հայկական ԽՍՀ Մինիստրների սովետի 1958 թվականի սեպտեմբերի 13-ի «Հայկական ՍՍՌ բնության պահպանության մասին» օրենքի կիրառման մասին» N 341 որոշմամբ։
Տարածքի շուրջ 94 տոկոսն անտառածածկ է։ Կազմավորվել է կաղնու, բոխու, հաճարենու, սովորական կենու, սոսու անտառների և կենդանիների պահպանության նպատակով։ Բուսական աշխարհը ներկայացված է բարձրակարգ բույսերի 432 ցեղի և 92 ընտանիքի 1100 տեսակներով, որոնցից 70-ը գրանցված են Հայաստանի «Կարմիր գրքում»։ Հարուստ է նաև կենդանական աշխարհը, իսկ կարմիրգրքյան կենդանատեսակներից այստեղ հանդիպում են կովկասյան ընձառյուծը, բեզոարյան այծը, գորշ արջը, կովկասյան մարեհավը, կասպիական հնդկահավը, հայկական իժը և այլ տեսակներ։
2024 թվականի աշնանը ՀՀ նախկին ՄԻՊ Արման Թաթոյանը հայտնել էր, որ ՀՀ Սյունիքի մարզում և Ներքին Հանդ գյուղի մերձակայքում ադրբեջանցի զինվորականները հակահետևակային և հակատանկային ականներ են տեղադրել, Շիկահողի արգելոցի հազարավոր ծառեր են հատել և գյուղի բնակիչներին զրկել են խմելու ջրից։
Թաթոյանը թվարկել էր Սյունիքի մարզում գտնվող սահմանամերձ Ներքին Հանդ գյուղին կից տեղակայված ադրբեջանական անօրինական դիրքերի հետևանքով առաջացած գյուղացիների խնդիրների և այդ հատվածում Բաքվի կողմից իրականացրած հանցանքների մասին։
