ԱՄՆ 60 կոնգրեսական պետքարտուղար Մարկո Ռուբիոյին կոչ է արել կիրառել «Ազատության» աջակցության ակտի 907-րդ հոդվածը՝ պահանջելով անհապաղ դադարեցնել ԱՄՆ ռազմական օգնությունն Ադրբեջանին, հայտնել է ANCA-ն։
Կոնգրեսականներ Մայք Լոլերը, Ֆրենք Փալոնը, Գաս Բիլիրակիսը և Գեյբ Ամոն գլխավորել են երկկուսակցական նամակը՝ ուղղված Ռուբիոյին։ Նրանք մատնանշել են Բաքվի կողմից Արցախի 120 000 բնիկ հայ քրիստոնյա բնակչության էթնիկ զտումները, ինքնիշխան հայկական տարածքների շարունակական օկուպացիան, ինչպես նաև հայ գերիների անօրինական կալանավորումն ու բռնությունները։
Հայ Դատի Ամերիկայի գործադիր տնօրեն Արամ Համբարյանը նշել է, որ ողջունում է կոնգրեսականների նախաձեռնությունը։
«Ադրբեջանի կողմից Արցախի բնիկ հայ քրիստոնյաների ցեղասպանական էթնիկ զտումներից, ինքնիշխան հայկական տարածքների շարունակական օկուպացիայից և հայ պատանդների անօրինական կալանավորումից հետո՝ չենք կարող չպահանջել, որ ԱՄՆ հարկատուները սուբսիդավորեն այս նավթով հարուստ և կոռումպացված օտարերկրյա բռնապետությունը»,- նշել է նա։
Նամակի ստորագրողները կոչ են արել չկիրառել այն շրջանցման իրավասությունը, որի շնորհիվ ԱՄՆ հաջորդական վարչակազմերը շրջանցել են 907-րդ հոդվածը, և փոխարենը պարտադրել օրենքի լիարժեք կիրարկումը՝ Ադրբեջանին իր հանցագործությունների համար պատասխանատվության ենթարկելու նպատակով։ 2001 թվականից ի վեր ԱՄՆ բոլոր նախագահներն օգտվել են շրջանցման դրույթից մինչև 2024 թվականը, երբ նախագահ Բայդենն առաջին անգամ կիրառել էր 907-րդ հոդվածը։
Այս նամակը շարունակում է Կոնգրեսում ձևավորված նախաձեռնությունը՝ կապված 2023 թվականին Սենատում միաձայն ընդունված «Հայերի պաշտպանության ակտի» հետ, որի համահեղինակներն էին այն ժամանակվա սենատոր, այժմ պետքարտուղար Ռուբիոն և սենատոր Գարի Փիթերսը։ Օրենքի ընդունումն ընդգծել է ԱՄՆ-Ադրբեջան ռազմական կապերի վերաբերյալ աճող երկկուսակցական մտահոգությունը։
Ըստ հայտարարության՝ Հայ դատի ԱՄՆ հանձնախումբը ANCA Rapid Responder համակարգի միջոցով Կոնգրեսին ուղղել է ավելի քան 50 000 անհատական նամակ։ Վերջին շաբաթների ընթացքում ANCA Rising Leaders ծրագրի երիտասարդ ակտիվիստները միացել են Հայ դատի Ամերիկայի հանձնախմբի Վաշինգտոնի և տարածաշրջանային թիմերին՝ այցելելով ավելի քան 400 կոնգրեսականի գրասենյակ՝ այս նախաձեռնությանն աջակցություն ապահովելու համար։
Ազատության աջակցության ակտի 907-րդ հոդվածն արգելում է ԱՄՆ-ին ռազմական օգնություն տրամադրել Ադրբեջանին՝ ի պատասխան Հայաստանի դեմ շարունակվող ագրեսիայի և Արցախում ցեղասպանության։
