Հայաստանն ստիպված կլինի ընտրություն կատարել ԵԱՏՄ-ի և ԵՄ-ի միջև, երկու աթոռի վրա նստել չի հաջողվի, «ՌԻԱ Նովոստիի» փոխանցմամբ՝ հայտարարել է ՌԴ փոխվարչապետ Ալեքսեյ Օվերչուկը:
Նա նշել է, որ ԵԱՏՄ-ն և ԵՄ-ն «միանման օրակարգեր» ունեն։
«Այդ պատճառով, իհարկե, երկրին անհրաժեշտ կլինի կողմնորոշվել և կատարել այդ ընտրությունը»,- հայտարարել է Օվերչուկը։
ՀՀ կառավարությունը հունվարի 9-ի նիստում հավանություն էր տվել Եվրամիությանը Հայաստանի անդամակցելու մասին նախագծին։ ԱԺ-ն փետրվարի 12-ի նիստում առաջին ընթերցմամբ ընդունել էր նախագիծը, որին «Պատիվ ունեմ» խմբակցությունը դեմ էր քվեարկել, իսկ «Հայաստան» խմբակցությունը չէր մասնակցել քվեարկությանը։
ՀՀ վարչապետ Նիկոլ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
Մարտի 24-ին ԱԺ եվրոպական ինտեգրման հարցերի հանձնաժողովը դրական եզրակացություն էր տվել «ԵՄ-ին ՀՀ անդամակցելու գործընթացի մեկնարկի մասին» նախագծին, որտեղ, ի տարբերություն նախնական տարբերակի, չկան «ՀՀ ժողովրդի կամքը» և «խնդիր դնելով Հայաստանը դարձնել անվտանգ, ապահով, զարգացած, բարեկեցիկ երկիր» եզրույթները։
Հայաստանի խորհրդարանը մարտի 26-ին ընդունել էր Եվրամիությանը Հայաստանի անդամակցելու մասին օրինագիծը:
