Քննչական կոմիտեի ղեկավար Արթուր Պողոսյանը կարգադրել է ստուգել ողջ համակարգը, ինչը լուրջ դժգոհության ալիք է բարձրացրել կառույցում, գրում է «Ժողովուրդ» թերթը՝ հղում անելով իր աղբյուրներին։
Թերթը նշել է, որ նախկինում Գլխավոր դատախազի տեղակալի պաշտոնն զբաղեցրած Պողոսյանին դեռ չի հաջողվել խուսափել Աննա Վարդապետյանի ենթակայի կարգավիճակից։ Որպես փաստարկ՝ հրապարակման մեջ բերվել է այն փաստը, որ Վարդապետյանի կողմից մերժված դատախազները, որոնց ՔԿ նախկին ղեկավար Արգիշտի Քյարամյանը նշանակել էր աշխատանքի, անմիջապես ազատվել էին կոմիտեում աշխատանքից։ Խոսքը Քննչական կոմիտեի հատկապես կարևոր գործերի քննության վարչության պետ Պետրոս Պետրոսյանի և Երևանի քննչական վարչություններից մեկի բաժնի պետ Գոռ Ալեյանի մասին է։
«Քննիչները աշխատում են մինչև ուշ գիշեր, փաստաթղթերը կարգի են բերում, որպեսզի վերադասներին զեկուցեն, որ ամեն ինչ կարգին է։ Բայց առաջիկայում Քննչական կոմիտեից կադրերի մեծ արտահոսք է սպասվում, քանի որ քննիչներից շատերը դժգոհում են, որ նման ծանրաբեռնվածությամբ հնարավոր չէ արդյունավետ աշխատել, և ավելի լավ է, որ իրենք զբաղվեն փաստաբանությամբ»,- պնդում է «Ժողովուրդ»-ը։
2024 թվականի նոյեմբերի 19-ին վարչապետ Նիկոլ Փաշինյանը որոշումներ էր ստորագրել ՆԳ նախարար Վահե Ղազարյանին, ՔԿ նախագահ Քյարամյանին, Պետական եկամուտների կոմիտեի նախագահ Ռուստամ Բադասյանին և Հակակոռուպցիոն կոմիտեի նախագահ Սասուն Խաչատրյանին աշխատանքից ազատելու մասին։
Նույն թվականի նոյեմբերի 22-ին վարչապետը մանրամասներ էր ներկայացրել ուժային կառուցների մի շարք բարձրաստիճան պաշտոնյաների վերջին հրաժարականների պատճառների մասին: Նա հայտարարել էր, որ պաշտոնյաներին փոխարինելը միանձնյա որոշում էր, և այդ հարցը թիմակիցների հետ չի քննարկել։ Փաշինյանը տեղի ունեցած կադրային փոփոխությունները որակել էր «ոչ թե կոնֆլիկտային, այլ աշխատանքային»՝ նշելով, որ բարձր է գնահատում պաշտոնյաների աշխատանքը:
2024-ի նոյեմբերի 28-ին կառավարությունը հաստատել էր Պողոսյանի թեկնածությունը Քննչական կոմիտեի նախագահի պաշտոնում։ Պողոսյանը 2022 թվականի սեպտեմբերի 30-ին նշանակվել է Գլխավոր դատախազի տեղակալ։ Մինչ այդ զբաղեցրել է ՀՀ ազգային անվտանգության ծառայության քննչական դեպարտամենտի պետի պաշտոնը։
