«Պետք էր պայքարել մինչև վերջ» և «Դուք նսեմացնում եք հերոսական պայքարը». հակասություն՝ ՀՀ ԱԺ նախագահի և Արցախի նախագահի միջև

Պետք էր մնալ Արցախում և պայքարել մինչև վերջ․ Ալեն Սիմոնյան

Փետրվարի 11-ին ՀՀ ԱԺ խոսնակ Ալեն Սիմոնյանը հայտարարել էր, որ արցախահայությունը կարող էր մնալ ԼՂ-ում և պայքարել մինչև վերջ։ Նա այսպես էր պատասխանել արցախցիների՝ հայրենիք հնարավոր վերադարձի մասին լրագրողի հարցին։ «Երբ ապահով լինի, Հայաստանը խաղաղության պայմանագիր կկնքի Ադրբեջանի հետ, կբարձրացվի այդ (հայերի՝ Արցախ վերադարձի- խմբ․) հարցը»,- ասել էր ԱԺ նախագահը։

Նույն օրը Սիմոնյանը հավելել էր, որ ադրբեջանական զորքերի հարձակման ժամանակ արցախցիները զանգահարել էին Հայաստանի իշխանություններին և խնդրել բացել սահմանները, որպեսզի ժողովուրդը կարողանա դուրս գալ։ Սիմոնյանը պնդել էր, որ նման խնդրանքներին իրենք պատասխանել են՝ «Ինչպե՞ս կարող է զինվորը շարունակել կռվել, եթե ժողովուրդը լքում է հողը», սակայն Արցախից ասել են՝ «Չէ-չէ, բացեք սահմանները, մենք դուրս ենք գալիս, մենք այստեղ չենք մնա»։

Երկար շրջափակումից հետո փորձում են նսեմացնել Արցախի ժողովրդի հերոսական պայքարը. Սամվել Շահրամանյան

Փետրվարի 12-ին Արցախի նախագահ Սամվել Շահրամանյանը դատապարտել է Սիմոնյանի խոսքերը և նրան կոչ արել ներողություն խնդրել Արցախի ժողովրդից։ Նա ընդգծել է, որ արցախցի յուրաքանչյուր բնակիչ արել է ամեն ինչ, որպեսզի շարունակի ապրել իր պատմական հայրենիքում։

Շահրամանյանը թող ասի, թե ինչպե՞ս է կարողացել հեռանալ Արցախից․ Ալեն Սիմոնյան

Սրան ի պատասխան՝ ԱԺ նախագահը Շահրամյանին կոչ է արել պատմել, թե ինչպե՞ս է նրան հաջողվել «ախռաննիկներով շրջապատված»՝ հեռանալ Արցախից, իսկ մնացած գործընկերները չեն կարողացել։

Մենք գործ ունենք տիեզերական մակարդակի ստորության և ցինիզմի հետ․ Արցախի ՄԻՊ

Փետրվարի 11-ին Սիմոնյանի հայտարարությունը քննադատել էր նաև Արցախի ՄԻՊ Գեղամ Ստեփանյանը՝ այն անվանելով «տիեզերական մակարդակի ստորություն»։ Նա հիշել էր Արցախի ժողովրդի պայքարն ու անձնվիրությունը 2023 թվականի սեպտեմբերին հանրապետության 10-ամսյա շրջափակումից հետո Ադրբեջանի զինված ուժերի ագրեսիայի ժամանակ։

Իշխանությունները նման հայտարարություններով պառակտում են հասարակությունը և քաոս են ստեղծում․ Արման Թաթոյան

Հայաստանի նախկին ՄԻՊ Արման Թաթոյանն Ազգային ժողովի նախագահի հայտարարությունը որակել է որպես ապացույց, որ իշխանություններն են պառակտում և ատելություն սերմանում հասարակության մեջ։ Ըստ նրա՝ այս կերպ ստեղծված քաոսը դարձել է «Քաղաքացիական պայմանագրի»՝ իշխանությունը պահպանելու երաշխիք։ «ՔՊ-ն սրանով է սնվում, և դա նրան ուժ է տալիս, ինչպես Ադրբեջանի իշխանությունների ուժի աղբյուրը թշնամանքն է հայերի նկատմամբ»,- նշել է Թաթոյանը։

Արցախյան կողմի կորուստները 2023 թվականի սեպտեմբերին

2023 թվականի սեպտեմբերին Լեռնային Ղարաբաղի վրա Ադրբեջանի հարձակման հետևանքով զոհվել է 223 մարդ, որից 25-ը՝ խաղաղ բնակիչներ, այդ թվում՝ 5 անչափահաս։ Մարտերի ընթացքում վիրավորվել է 244 մարդ, որոնցից մոտ 80-ը խաղաղ բնակիչներ են, այդ թվում՝ 10 անչափահաս։ 20 մարդ անհետ կորել է, որոնցից 5-ը խաղաղ բնակիչներ են։ Այս իրադարձություններից հետո ավելի քան 100 հազար հայեր ստիպված Լեռնային Ղարաբաղից տեղափոխվել էին Հայաստան։