ԱԺ «Պատիվ ունեմ» խմբակցությունը դեմ է քվեարկելու «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագծին, ասվում է խմբակցության տարածած հաղորդագրությունում։
Ըստ հայտարարության՝ վերպետական միջազգային կազմակերպություններին անդամակցության ընթացակարգը մանրամասն կանոնակարգված է ՀՀ սահմանադրության 205-րդ հոդվածով և «Միջազգային պայմանագրերի մասին» ՀՀ օրենքի 15-րդ հոդվածով:
«Եվրոպական Միությանը, որպես վերպետական միջազգային կազմակերպության, անդամակցելու գործընթացը մեկնարկելու իրավասությունը պատկանում է կառավարությանը, իսկ անդամակցության համար անհրաժեշտ հանրաքվե անցկացնելու որոշման ընդունումը` Ազգային ժողովին: Անդամակցության վերաբերյալ վերջնական որոշումը կայացվում է հանրաքվեի միջոցով, որով անմիջականորեն արտահայտվում է ՀՀ ժողովրդի կամքը»,- ասված է հայտարարության մեջ:
Ըստ խմբակցության՝ «օրենքի նախագիծն իրավական առումով անհեթեթ փաստաթուղթ է», քանի որ այն չի համապատասխանում ներկայացվող պահանջներին և ո՛չ ավելացնում, ո՛չ պակասեցնում է վերպետական միջազգային կազմակերպություններին անդամակցության վերաբերյալ օրենսդրական պահանջները:
«Նախագիծն իր էությամբ հայտարարություն է, բայց ոչ օրենք, քանի որ այն չի պարունակում վարքագծի պարտադիր կանոններ որևէ իրավասուբյեկտի համար»,- ասված է հայտարարության մեջ:
Ըստ խմբակցության՝ նման օրինագիծ կարելի է ընդունել միայն հանրաքվեի միջոցով։
«Եվրոպական Միությանը Հայաստանի անդամակցելու գործընթացի մեկնարկի վերաբերյալ դրույթը որևէ նորմատիվ տարր չի պարունակում: Այն չի պարտադրում և չի կարող պարտադրել կառավարությանը` Եվրոպական Միության հետ անդամակցության վերաբերյալ բանակցություններ սկսել: Նման պարտադրանքը կհակասի ՀՀ սահմանադրությամբ ամրագրված իշխանությունների բաժանման սկզբունքին»,- նշել է խմբակցությունը։
Ըստ հայտարարության՝ որպես քաղաքական փաստաթուղթ, օրինագիծը կարող է անդառնալի քաղաքական և տնտեսական հետևանքներ առաջացնել Հայաստանի համար՝ հաշվի առնելով Հայաստանի անդամակցությունը վերպետական կազմակերպություններին, մասնավորապես՝ ԵԱՏՄ-ին։
«Հաշվի առնելով գործընկեր պետությունների հայտարարությունները, ինչպես նաև միջազգային հարաբերությունների և միջազգային իրավունքի բազային սկզբունքները՝ ակնհայտ է դառնում, որ այս գործընթացը վտանգում է մեր տնտեսության համար կենսական նշանակություն ունեցող ԵԱՏՄ շուկաների հետ իրականացվող ազատ առևտուրը»,- ասված է հայտարարության մեջ։
Կառավարությունը հունվարի 9-ի նիստում հավանություն էր տվել ՀՀ-ի՝ ԵՄ-ին անդամակցելու գործընթացի մեկնարկի վերաբերյալ նախագծին։ ՀՀ վարչապետ Նիկոլ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
Հունվարի 24-ին ՀՀ ԱԺ եվրոպական ինտեգրման հարցերի մշտական հանձնաժողովը դրական եզրակացություն էր տվել ԵՄ-ին անդամակցելու գործընթացի մեկնարկի վերաբերյալ նախագծին։ Հունվարի 29-ին ՌԴ փոխվարչապետ Ալեքսեյ Օվերչուկը հայտարարել էր, որ Հայաստանի անդամակցությունը Եվրամիությանը կհանգեցնի Եվրասիական տնտեսական միությունից (ԵԱՏՄ) Հայաստանի դուրս գալուն և ՀՀ-ի համար ԵԱՏՄ շուկայի փակմանը։
Հունվարի 31-ին ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ ԵՄ-ին Հայաստանի ինտեգրման հետևանքով հնարավոր է հայկական արտադրանքը բախվի ավելի բարձր մաքսատուրքերի, ինչը կբերի ՀՆԱ-ի աճի տեմպերի կտրուկ անկման և Հայաստանի բնակչության տոտալ աղքատացման։ Զախարովան կանխատեսել էր նաև հայկական ապրանքների արտահանման 80 տոկոս կրճատում։
