Արդարադատության նախարարը պետք է «Քաղաքացիական պայմանագրի» ներկայացուցիչ լինի, միարժամանակ՝ ուժեղ կառավարիչ և քաղաքական թիմի կարկառուն ներկայացուցիչ, հայտարարել է ՀՀ ԱԺ պաշտպանության և անվտանգության հարցերի մշտական հանձնաժողովի նախագահ, «Քաղացիական պայմանագրի» պատգամավոր Անդրանիկ Քոչարյանը։
Նա պատմել է, թե ինչ չափանիշներով է քաղաքական թիմը պատրաստվում ընտրել Արդարադատության նոր նախարարի։
«Հրապարակը»-ի տեղեկություններով՝ նախարարի պաշտոնում առաջադրված են հետևյալ թեկնածուները՝ վարչապետի խոսնակ Նազելի Բաղդասարյանը, Երևանի փոխքաղաքապետ Սուրեն Գրիգորյանը, ՔՊ պատգամավոր Արմեն Խաչատրյանը և փաստաբան Ալեքսանդր Սիրունյանը:
Քոչարյանի խոսքով՝ նախարարին առաջին փորձից չհաջողվեց ընտրել։
«Դրվեց ձևաչափ, որ թեկնածությունները քննարկվում են կուսակցական ձևաչափով, այսինքն՝ վարչությունը պետք է թեկնածություններ քննարկի։ Բայց մի անգամ փորձ արվեց, մերժվեց Արփի Դավոյանը։ Հիմա երկրորդ փորձը կարվի։ Առաջին փորձի ժամանակ որոշվեց, որ լինի կին կուսակցական, հիմա կնոջ պահանջը հանված է և պետք է լինի կուսակցական, իրավաբան թե ոչ՝ չգիտեմ, կարող է լինել ուժեղ կառավարիչ, քաղաքական թիմի կարկառուն ներկայացուցիչ, ինչպես Սուրեն Պապիկյանի նշանակման դեպքում էր»,- ասել է նա։
Քոչարյանը հավելել է, որ կառավարությունը չի կարող երկար այդ պաշտոնը «դատարկ թողնել», և առաջադրված թեկնածուների վերաբերյալ վերջնական որոշումը կկայացնի վարչապետ Նիկոլ Փաշինյանը։
«ՀՀ վարչապետը պետք է համապատասխան կոնսուլտացիաների արդյունքում գտնի այն մարդուն, որին կվստահի այդ պաշտոնը։ Դա վարչապետի իրավասությունների շրջանակում է»,- եզրափակել է պատգամավորը։
Սեպտեմբերի 25-ին ՔՊ պատգամավոր Հովիկ Աղազարյանն Armenia Today-ին հայտնել էր, որ խմբակցությունում ստորագրահավաք են սկսել Արդարադատության նախարար Գրիգոր Մինասյանի հրաժարականի համար։ Մինասյանը հոկտեմբերի 1-ին հրաժարականի դիմում էր ներկայացրել։ Նախագահ Վահագն Խաչատուրյանը հոկտեմբերի 2-ի հրամանագրով պաշտոնանկ էր արել Արդարադատության նախարարին:
Հոկտեմբերի 10-ին Armlur.am-ը հայտնել էր, որ ՔՊ վարչության փակ նիստում կուսակցության ղեկավարությունը մերժել էր Արդարադատության նախարարի բոլոր թեկնածուներին։ Հոկտեմբերի 14-ին Խաչատրյանն Armenia Today-ին տեղեկացրել էր, որ ընդունել է Արդարադատության նախարարի պաշտոնում իր թեկնածության առաջարկը։
