Վերաքննիչ քրեական դատարանն այսօր քննել է հասարակական-քաղաքական գործիչ Ավետիք Չալաբյանի գործով բողոքը։ Պաշտպանական կողմը բողոքարկել է դատարանի վճիռը, որով Չալաբյանին 2 տարի 6 ամիս ժամկետով արգել են քաղաքական գործունեությամբ զբաղվել, հավաքներ կազմակերպել, մասնակցել հավաքների և այլ հանրային միջոցառումների։
Դատական նիստից հետո Չալաբյանը լրագրողներին հայտնել է, որ դատավճռի հիմքում դրված բազմաթիվ ապացույցներ ապօրինի են։
«Մենք հիմնավորեցինք, որ դատավճռի հիմքում դրված բազմաթիվ ապացույցներ ապօրինի են։ Օրինակ՝ անհայտ աղբյուրներից ապացույցներ են ներկայացրել»,- նշել է նա։
Չալաբյանն ընդգծել է, որ նշված դրույթը քաղաքական հետապնդում է։
«Դասական իմաստով՝ սա քաղաքական հետապնդում է։ Քրեականացվում է մի բան, որն աշխարհում քրեականացված չէ։ Նույն տրամաբանությամբ կարելի է քրեականացնել շնչելը, վազելը, սանհանգույցից օգտվելը։ Մեր նպատակն է հասնել գործի բեկանմանը, ինչպես նաև հասնել նրան, որ սա, որպես հանցակազմ, դադարի Հայաստանում գոյություն ունենալ։ Այն ասիմետրիկ կերպով միայն ընդդիմության դեմ է օգտագործվում»,- նշել է Չալաբյանը։
Անդրադառնալով իր դեմ ցուցմունք տված Թոռնիկ Ալիյանի՝ Սննդամթերքի անվտանգության տեսչական մարմնում աշխատանքի անցնելուն, Չալաբյանը նշել է, որ «մարդկանց օգտագործելն ու փչացնելն այս իշխանության ձեռագիրն է»։
«Լավ կլիներ, որ բոլոր նրանք, ովքեր չարիքի իշխանության հետ համագործակցության են գնում, գիտակցեն, որ այդպես չի կարելի»,- հավելել է նա։
Չալաբյանը հակասահմանադրական է որակել Տավուշի գյուղերի հնարավոր զիջումն Ադրբեջանին։
«Այդ գործընթացը հակասահմանադրական և հակաիրավական է։ Քանի դեռ Հայաստանի ու Ադրբեջանի միջև սահմանազատում չկա, որը վավերացված կլինի և՛ Հայաստանի, և՛ Ադրբեջանի կողմից, որևէ պաշտոնատար անձ իրավունք չունի զորքերի հետքաշման հրաման տալ։ Եթե նման հրաման լինի՝ պատիժն անխուսափելի է լինելու»,- եզրափակել է Չալաբյանը։
Մարտի 21-ին մամուլը գրել էր, որ Չալաբյանի դեմ ցուցմունք տված Ալիյանը` Ագրարային համալսարանի ուսխորհրդի քարտուղարը, աշխատանքի է անցել Սննդամթերքի անվտանգության տեսչական մարմնում։ Ալիյանի ցուցմունքից հետո Չալաբյանը մեղադրվել էր Ագրարային համալսարանի ուսանողներին ընդդիմության հավաքին մասնակցելու նպատակով նյութապես շահագրգռելու համար:
Շուրջ 3 ամիս կալանքի տակ մնալուց հետո Չալաբյանն ազատ էր արձակվել՝ 15 միլիոն գրավի դիմաց։ Դատարանը Չալաբյանին դատապարտել էր ազատության սահմանափակման 2 տարի 6 ամիս ժամկետով՝ արգելելով կազմակերպել հավաքներ, մասնակցել հավաքների և այլ հանրային միջոցառումների, ինչպես նաև առանց նրա վարքագծի նկատմամբ վերահսկողություն իրականացնող իրավասու մարմնի համաձայնության փոխել բնակության վայրը:
