«ՎՏԲ Հայաստան»-ը մարտի 19-ի առավոտյան հայտարարեց, որ մարտի 30-ից ռուսական վճարային ՎՏԲ «Միր» քարտերի համար, որի օպերատորը փետրվարին հայտնվել է ԱՄՆ պատժամիջոցների տակ, կարող են լինել POS տերմինալներում անկանխիկ վճարումների և այլ բանկերի բանկոմատներից կանխիկացման սահմանափակումներ։
Բանկից պարզաբանել են, որ իրենք կշարունակեն աշխատել ռուսական ցանկացած բանկի «Միր» քարտերով, թույլ կտան նրանց միջոցներ կանխիկացնել իրենց ցանցի բանկոմատներից և այլ գործարքներ կատարել։
«ԱյԴի բանկ»-ը հաստատեց, որ մարտի 30-ից կդադարեցնի «Միր» քարտերի սպասարկումն իր բանկոմատներում։ Բանկի հաղորդագրության մեջ ասված է, որ POS տերմինալներն ու բանկոմատները կդադարեցնեն այդ քարտերի սպասարկումը։
Armenia Today-ը փորձեց կապ հաստատել Հայաստանի 12 բանկի հետ՝ պարզելու, թե արդյոք նրանք կշարունակեն աշխատե՞լ «Միր» քարտերով, ինչպես նաև մարտի 15-ին հարցում էր կատարել ՀՀ Կենտրոնական բանկ՝ պարզաբանելու, թե արդյոք խորհո՞ւրդ է տվել բանկերին դադարեցնել աշխատանքը վճարային համակարգի հետ։
ՀՀ Կենտրոնական բանկը չի հաստատել և չի հերքել նման առաջարկությունների առկայությունը՝ ասելով, որ բանկերն իրենք են որոշումներ կայացնում այդ մասին։ Միևնույն ժամանակ TACC-ը, վկայակոչելով Հայաստանի բանկային հատվածի բարձրաստիճան աղբյուրի, հայտնել է, որ ԿԲ-ն մարտի 29-ից արգելել է տեղական բանկերին սպասարկել «Միր» քարտերը՝ ամերիկյան պատժամիջոցների տակ ընկնելու սպառնալիքի պատճառով։
«Ինեկոբանկը» հայտարարեց, որ դադարեցրել է «Միր» քարտերի սպասարկումը՝ ընդգծելով, որ դա պայմանավորված է պատժամիջոցներով և բանկի որոշումը չէ։
«Կոնվերսբանկը» նշեց, որ հավելյալ կտեղեկացնի «Միր» քարտերի հետ կապված ծրագրերի մասին, սակայն առայժմ սպասարկում է այդ քարտերը։
Վեց բանկեր՝ «Արարատբանկը», «Ամերիաբանկը», «Հայեկոնոմբանկը», «Յունիբանկը», «Էվոկաբանկը» և «Արդշինբանկը», հայտարարել են, որ դեռևս որոշում չեն կայացրել «Միր» քարտերի հետ հետագա աշխատանքի վերաբերյալ։
Հինգ բանկերի հետ՝ «Ակբաբանկ», «Ամիոբանկ», «Արցախբանկ», «Ֆաստբանկ», «Բիբլոսբանկ», կապ հաստատել չհաջողվեց։
