Հոկտեմբերի 2-ի ժամը 16:00-ի դրությամբ՝ Հայաստան է տեղափոխվել ԼՂ-ից բռնի տեղահանված 100 520 անձ, Հակարիի կամուրջը հատել է 21 107 տրանսպորտային միջոց, հաշվառվել է 89 167 անձ, հայտարարել է վարչապետի մամուլի խոսնակ Նազելի Բաղդասարյանը։ Նա նշել է, որ ԼՂ-ում մնացել են պաշտոնատար անձինք, բնակչության շատ քիչ հատված։
Ժամը 16:00-ի դրությամբ՝ 53 935 անձ (54%-ը) օգտվել է պետության կողմից առաջարկված կեցավայրերից, որոնց բաշխվածությունն ըստ մարզերի հետևյալն է՝
Արագածոտնի մարզ ՝ 2 454
Արարատի մարզ՝ 13 050
Արմավիրի մարզ՝ 5186
Գեղարքունիքի մարզ՝ 4337
Լոռու մարզ՝ 3263
Կոտայքի մարզ՝ 13 297
Շիրակի մարզ՝ 2558
Սյունիքի մարզ՝ 5089
Վայոց Ձորի մարզ՝ 2134
Տավուշի մարզ՝ 2 567
Հիշեցնելով, որ այս շաբաթվանից կառավարությունն սկսում է 100 հազար դրամների բաշխումը, նա նշել է․ «Այն անձինք, ովքեր ունեն բանկային քարտեր, անհրաժեշտ է, որ բանքային քարտերի տվյալները կամ քարտերի հաշվեհամարները փոխանցեն միասնական սոցիալական ծառայություն»։
Իսկ ովքեր չունեն, կառավարությունից հորդորել են բացել հաշիվներ ու տրամադրել ծառայությանը։ Նա հայտնել է, որ հաշվեհամարները բացվելու են անվճար։
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ, որի հետևանքով՝ վերջին տվյալներով՝ կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։ Արցախից բռնի տեղահանվել ու Հայաստան է տեղափոխվել 100 514 անձ, հաշվառվել է 85 975 անձ (86%-ը)։
Սեպտեմբերի 25-ին Արցախի «Արդարություն» կուսակցության պատգամավոր Մետաքսե Հակոբյանը Armenia Today-ին հայտնել էր, որ Ստեփանակերտի հարակից տարածքում գտնվող բենզինի պահեստում, որտեղից բենզին էին տրամադրում սեփական մեքենանաներով Արցախից հեռացող քաղաքացիներին, պայթյուն է տեղի ունեցել։ Սեպտեմբերի 29-ին Արցախի ՆԳՆ-ի տվյալներով, փրկարարները աղետի տարածքից 170 աճյուն և մասունք են հայտնաբերել:
Մանրամասն՝ տեսանյութում։
