Պետդումայի ԱՊՀ գործերով, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը հայտարարել է, որ Ադրբեջանի հարվածները ռուսական բազայի տեղակայմանը և Լեռնային Ղարաբաղում վեց ռուս զինվորականների մահը պատահականություն չեն։ Նրա կարծիքով, Բաքվի նպատակն է ստիպել ռուս խաղաղապահներին չմիջամտել Լեռնային Ղարաբաղի հետ կապված իրավիճակին։
«Այժմ պայքար է տարվում, որպեսզի մեր խաղաղապահները չմնան այնտեղ։ Սա պատահականություն չէ. ոչ միայն խաղաղապահներ են զոհվել, այլ նաև հարձակումներ են իրականացվել տեղանքի վրա, պայթեցվել է պահեստ և այլն։ Սա ահաբեկման ռազմավարություն է, որպեսզի մեր խաղաղապահներն իրենց պահեն այնպես, ինչպես կցանկանար Ադրբեջանը՝ ավելի հանգիստ։ Մենք պետք է ընտրենք՝ կա՛մ կհանդուրժենք, կա՛մ չենք հանդուրժի։ Ակնհայտ է, որ մեր խաղաղապահները, եթե սկսեն տեր կանգնել նրանց [Լեռնային Ղարաբաղի հայերին], անմիջապես հարձակման են ենթարկվում»,- ընդգծել է Զատուլինը «Խոսում է Մոսկվան» ռադիոկայանին տված հարցազրույցում։
Սեպտեմբերի 20-ին ՌԴ ՊՆ-ն հայտնել է մի քանի խաղաղապահների մահվան մասին, երբ գնդակոծվել է ավտոմեքենան։ Ավելի ուշ Ադրբեջանի դատախազությունը պարզաբանել է, որ սպանվել է վեց ռուս։ Բաքվում քրեական գործ է հարուցվել:
Սեպտեմբերի 21-ին Ադրբեջանի նախագահ Իլհամ Ալիևը ՌԴ նախագահ Վլադիմիր Պուտինի հետ ադրբեջանական կողմի նախաձեռնությամբ կայացած հեռախոսազրույցում ներողություն է խնդրել Լեռնային Ղարաբաղում ռուս խաղաղապահների մահվան համար։ Նա նաեւ խոստացել է դրամական օգնություն ցուցաբերել նրանց ընտանիքներին եւ մանրակրկիտ հետաքննություն անցկացնել։ Ադրբեջանի ԱԳՆ ղեկավար Ջեյհուն Բայրամովը սեպտեմբերի 22-ին իր ռուս գործընկեր Սերգեյ Լավրովի հետ հանդիպման ժամանակ ասել է, որ հետաքննության առաջին արդյունքներն արդեն ստացվել են, և բոլոր մեղավորները կպատժվեն։
Հայաստանի վարչապետ Նիկոլ Փաշինյանը սեպտեմբերի 24-ին երկրի քաղաքացիներին ուղղված ուղերձում հայտարարեց, որ Լեռնային Ղարաբաղում ստեղծված իրավիճակի ողջ պատասխանատվությունն ամբողջությամբ կրում է «էթնիկ զտումների քաղաքականություն վարող Ադրբեջանը և ռուսական խաղաղապահ զորախումբը Լեռնային Ղարաբաղում»։
Ռուս խաղաղապահները Լեռնային Ղարաբաղում են գտնվում 2020 թվականից, ասվում է Ռուսաստանի, Հայաստանի և Ադրբեջանի ղեկավարների նոյեմբերի 9-ի հայտարարության մեջ։
