Իր առաջին ճանապարհորդությանն է նախապատրաստվում աշխարհի ամենամեծ զբոսանավը՝ Icon of the Seas-ը, որն իր չափերով 5 անգամ գերազանցում է լեգենդար «Տիտանիկին», հայտնում է Independent-ը։
Զբոսանավը կարող է մինչև 7600 ուղևորի տեղափոխել: Ունի 20 տախտակամած, ավելի քան 40 ռեստորան և բոուլինգի սրահներ։ Իր 365 մետր երկարությամբ և մոտ 250 հազար տոննա քաշով այն աշխարհի ամենամեծ մարդատար նավն է։ Icon of the Seas-ը հաջողությամբ անցել է ծովային փորձարկումները և նախատեսվում է նավարկել դեպի Կարիբյան կղզիներ:
Icon of the Seas-ը, որը նախագծվել է Royal Caribbean-ի կողմից, որպես վառելիք կօգտագործի էկոլոգիապես մաքուր հեղուկ բնական գազ: Մշակողները դեռ չեն բացահայտել մանրամասներ Icon of the Seas-ում օգտագործվող այլ առաջադեմ տեխնոլոգիաների մասին:
Icon of the Seas-ի ուղևորներին կառաջարկվի ավելի քան 40 վայր ժամանցի և աղմկոտ հանդիպումների համար։ Նավը կունենա նաև հսկայական ծովային ջրաշխարհ՝ վեց ջրային սլայդներով, յոթ լողավազաններով (այդ թվում՝ աղի ջրի լողավազաններով) և ինը տաք լոգարաններով։ Ուղևորների հարմարավետության համար կգործեն 22 վերելակ, կինոթատրոն, խաղատուն, ինչպես նաև ֆիթնես կենտրոն, մինի գոլֆ և մարզասերների համար մագլցման պատ։
Բացի այդ, նավի վրա կտրամադրվի կացության 28 տարբերակ, այդ թվում՝ տարբեր դասերի մեծ խցիկներ զույգերի համար և տարբերակներ՝ դեպի ծովային տեսարան: Յուրաքանչյուր տնակ կահավորված կլինի օդորակիչով և անհատական լոգարանով: Երեխաներ ունեցող ընտանիքների համար կգործեն դայակի ծառայություններ, ինչպես նաև հատուկ և դիետիկ սնունդ՝ ծնողների համար:
Առաջին նավարկությունը նախատեսված է 2024 թվականի հունվարին։ 7-օրյա նավարկության արժեքն սկսվում է 2600 եվրոյից։
