Հրաձգային մարզում՝ կրակային ճիշտ դիրքի զբաղեցում, պահեստատուփի լիցքավորում, անվտանգության կանոնների հրահանգավորում, թիրախի նշանառում և, իհարկե, գործնական հրաձգության վարում ինքնաձիգներից։ Կանայք կարող են հերթագրվել և հրաձգարաններում անցնել մարտական զենքից կրակային պատրաստություն։
Armenia Today-ի նկարահանող խումբը նոյեմբերի 12-ին այցելել է ՀՀ պաշտպանության նախարարության զորավարժարան և մասնակցել մարտական հրաձգության դասընթացներին
Նշենք, որ հոկտեմբերի 15-ին ՀՀ ՊՆ-ն հայտարարություն էր տարածել՝ հայտնելով, որ հաշվի առնելով քաղաքացիներից ստացվող բազմաթիվ խնդրանքներն ու առաջարկները, նախարարությունը կազմակերպում է մարտական հրաձգության դասընթացներ, որոնց մասնակցելու են զինվորական ծառայություն չանցած քաղաքացիները: Առաջին փուլի հերթագրումն իրականացվել է Երևան քաղաքի բնակիչների համար հոկտեմբերի 17-30-ը ներառյալ։
Այսօր արդեն մոտ 1500 մասնակից, որոնց մեծ մասը կանայք ու աղջիկներ են, մասնակցում են պրակտիկ դասընթացին, որտեղ նրանց ներկայացվել է ժամանակակից սպառազինության մի շարք նմուշների, ջերմատեսիլ սարքերի, նշանոցների մարտավարատեխնիկական առանձնահատկությունները։
Մանկավարժ, մանկապարտեզի տնօրեն Ծաղիկ Բաբայանը հայտարարությունից հետո, որոշել է դիմել, հերթագրվել ու անցնել մարտական պատրաստվածության դասընթացը, բայց ոչ թե միայնակ, այլ գործընկերներով։ Իրական զենքի հետ վերջին անգամ դպրոցում էր գործ ունեցել։ Այսօր արդեն կամրջելով հիշողությունը խորհրդային դպրոցին` ռազմագիտության դասին, մարտական հմտություններն է զարգացնում։
Բարդ բան չկա, ցանկություն է պետք, ասում է մանկավարժ Ծաղիկը։ Բայց քանի դեռ երկիրը վտանգի մեջ է` թե՛ կին, թե՛ տղամարդ պետք է տիրապետեն մարտարվեստին։
«Նամանավանդ մեր երկիրը, որ պատերազմական դրության մեջ է, ինչ կապ ունի կին ես, թե տղամարդ»,-նշեց նա։
Մասնագիտությամբ կենսաբան, մանկավարժ Անժելան Ծաղիկի հետ միասին էր գրանցվել դասընթացներին։ Այսպիսի մտադրություն վաղուց է ունեցել, իսկ իրականացնելու հնարավորությունները բացակայում էին։ Այժմ ստեղծված հնարավորությունն են օգտագործում։
Արփինեն ՈՄԱ-ի նախնական զինվորական պատրաստվածության դասընթացն ավարտելուց հետո քայլերն ուղել է Պաշտպանության նախարարություն։ «Բանակը կնոջ տեղը չէ» ասողներին հորդորում է իրականության հետ հաշվի նստել ու հասկանալ, թե ինչ երկրում ենք ապրում ու գնահատել արտաքին վտանգները։ Ինչքան պատրաստ լինենք պատերազմին, այդքան մոտ կլինենք խաղաղությունը, ասում է Արփինեն։
1500 զինվորական ծառայություն չանցած մասնակից, որում նախապատվությունը տրվել էր կանանց ու աղջիկներին, մեկ օր անցկացրին զորամասերից մեկի հրաձգարանում, սովորեցին զենքի հետ վարվեցողության կանոնները, իսկ նրանցից շատերն առաջին անգամ իրական զենքով ճիշտ նշակետեր խոցեցին։
Նշենք, որ Պաշտպանության նախարարությունը գործարկել է նոր էլեկտրոնային հարթակ, որտեղ մարտական հրաձգության դասընթացներին մասնակցած քաղաքացիները կարող են դասընթացի վերաբերյալ թողնել իրենց մեկնաբանությունները և առաջարկությունները:
