Ակնկալում ենք, որ մյուս տարվա տնտեսական աճը կլինի 4,5 տոկոսի շրջանակներում։ Այս մասին այսօր ԱԺ մշտական հանձնաժողովների համատեղ նիստում 2023թ. պետական բյուջեի մասին օրենքի նախագծի քննարկմանն ասաց Կենտրոնական բանկի նախագահ Մարտին Գալստյանը։
Նա նաև ուշադրություն հրավիրեց հարկային բարեփոխումների իրականացման վրա, որոնք ուղղված են 2023 թվականին հարկերի հավաքագրման ավելացման լծակների ամրապնդմանը։
Անդրադառնալով տնտեսական աճի Կենտրոնական բանկի կանխատեսումներին՝ Գալստյանն ասաց. «Տնտեսական աճի հետ կապված վերջին կանխատեսումը, որ արել էինք, դա 12,9 տոկոս տնտեսկան աճն էր այս տարվա համար: Մեր կանախտեսումների համաձայն՝ մյուս տարվա համար տնտեսական աճի ցուցանիշը կլինի մի փոքր ցածր, քան կառավարության կողմից կանխատեսված 7 տոկոսն է։ Մենք ակնկալում ենք, որ աճը կլինի 4,5 տոկոսի շրջանակներում»,- ասաց նա:
Գալստյանը հավելեց, որ ոչ միայն Կենտրոնական բանկը, այլև միջազգային փորձագետները կարծում են, որ ստեղծված իրավիճակում միակ արդյունավետ քաղաքականությունը հարկաբյուջետային և դրամավարկային զսպումն ու համակարգումն է, քանի որ գնաճը «գործնականում անհնար է» հաղթահարել միայն պետական միջոցներով։
