Իտալական «Ռոմայի» երկրպագուները Հենրիխ Մխիթարյանին խնդրում են մնալ ակումբում։ «Ինտերի» առաջարկությամբ հրապուրված հայը Կոնֆերանսների լիգայի եզրափակչում հռոմեացիների հաղթարշավից հետո կազմակերպված երեկույթից լուսանկարներ է հրապարակել՝ «Հիշարժան օր, շնորհակալություն, Հռոմ» գրառմամբ:
Ի պատասխան՝ երկրպագուները նրան կոչ են արել մնալ ակումբում, հաղորդում է Gazzetta dello Sport-ը։ Երկրպագուները հիշեցրել են երեք տարի առաջ Դանիելե Դե Ռոսիի հեռանալու մասին՝ չնայած ակումբում մնալու բազմաթիվ կոչերին։ Նախորդ տարի թիմը լքել էր Էդին Ջեկոն, ով տեղափոխվել էր «Ինտեր»։ «Ռոմայի» երկրպագուների համար Մխիթարյանի հեռանալը հնարավոր է ողբերգություն չդառնա, բայց հայը նրանց սիրելի խաղացողն է։ Թիմի գլխավոր մարզիչ Ժոզե Մոուրինյոն նրան համարում է կարևոր խաղացող, և այդ պատճառով սոցիալական ցանցերը լի են կոչերով։
Պարբերականը նշում է, որ Մխիթարյանի տեղափոխության մասին որոշումը կկայացվի առաջիկա օրերին: Նշենք, որ ավելի վաղ տեղեկություն էր տարածվել, որ «Ինտերը» բանակցություններ է վարել «Ռոմայի» կիսապաշտպան Հենրիխ Մխիթարյանի հետ։ 33-ամյա կիսապաշտպանը նախնական համաձայնություն է տվել տեղափոխվել միլանյան ակումբ։ 33-ամյա հայ կիսապաշտպանի պայմանագիրը «Ռոմայի» հետ ավարտվում է այս տարվա հունիսին։ Ավելի վաղ տեղեկություն էր հայտնվել, որ «Ինտերը» Մխիթարյանին առաջարկել է երկու տարվա պայմանագիր՝ 3,5 մլն եվրո աշխատավարձով, ինչպես նաեւ 2 մլն եվրո գումարի բոնուսներ և միջնորդավճարներ գործակալների համար:
