Կառավարությունն այսօրվա՝ ապրիլի 15-ի նիստում ընդունեց նախագիծ, որի շահառուներին հնարավորություն կտրվի փոփոխված մարման ժամանակացույցով սպասարկել 2020-2021 թվականներին ներգրավված վարկերը, հնարավարություն կունենան կազմակերպել ընթացիկ տարվա գյուղատնտեսական հումքի մթերումների գործընթացը։ Բացի այդ, հնարավորություն կտրվի ծրագրի շրջանակներում ձեռք բերելու պտուղբանջարեղենի պահածոների արտադրության մեջ օգտագործվող ապակե բանկաներ, կափարիչներ, ասեպտիկ պարկեր և դրանց տարաներ։
Ինչպես կառավարության նիստի ժամանակ ասաց ՀՀ էկոնոմիկայի նախարար Վահան Քերոբյանը՝ նախագծով առաջարկվում է գյուղատնտեսական հումքի մթերումների նպատակով տրամադրվող վարկերի տոկոսադրույքների սուբսիդավորման ծրագրում կատարել համապատասխան փոփոխություններ և լրացումներ, ըստ որոնց կառավարության կողմից 2022 թվականի հունիսի 1-ից մինչև 2022 թվականի դեկտեմբերի 30-ը տրամադրվում է մինչև 50%-ի չափով բյուջետային երաշխիք, բայց ոչ ավելի, քան 2021 թվականին արտահանված արտադրանքի արժեքը։
Քերոբյանի խոսքով՝ ակնկալվում է այս տարի ավելի մեծ քանակի գյուղմթերքի մթերում։ 2022 թվականի ապրիլի 16-ից մինչև 2022 թվականի դեկտեմբերի 30-ը տրամադրվող վարկերի համար վերին շեմ չի սահմանվում և սուբսիդավորվում են տրամադրվող վարկերի 10 տոկոսային կետը։
Ծրագրի շահառուներին 2020 թվականին տրամադրված վարկերի համար սահմանված մայր գումարի մարման, իսկ 2021 թվականին տրամադրված վարկերի համար սահմանված արտոնյալ և մայր գումարի մարման համար սահմանված ժամկետները կարող են երկարաձգվել մինչև 6 ամիս ժամկետով՝ ծրագրին մասնակից ֆինանսական կառույցների և շահառուների փոխադարձ համաձայնությամբ։
Խաղողի մթերումների համար տրամադրվող վարկի չափի հաշվարկում ներառվում են միայն հումքի գնման այն պայմանագրերը, որոնք կնքվել են մինչև տվյալ տարվա հուլիսի 1-ը, իսկ պտուղբանջարեղենի մթերումների համար՝ մինչև հունիսի 1-ը։
Ծրագիրը լրացվում է խաղողի, բերքի և կաթի գնման պայմանագրերի օրինակելի ձևերով և սահմանվում է, որ պայմանագրերը պետք է կնքվեն այդ ձևերին համապատասխան։
