Կենտրոնական ընտրական հանձնաժողովը (ԿԸՀ) մերժել է Գլխավոր դատախազության՝ «Ուժեղ Հայաստան» դաշինքի ցուցակը գլխավորող Նարեկ Կարապետյանի նկատմամբ ազատությունից զրկելու խափանման միջոց կիրառելուն համաձայնություն տալու վերաբերյալ միջնորդությունը, հայտնել է Կարապետյանի փաստաբան Արամ Վարդևանյանը։
«ԿԸՀ-ն վերադարձրեց միջնորդությունը, ինչը նշանակում է, որ որևէ խափանման միջոց՝ այդ թվում կալանք կամ տնային կալանք, չի կիրառվի»,- նշել է փաստաբանը։
Միևնույն ժամանակ, Վարդևանյանն ընդգծել է, որ պաշտպանական կողմն անընդունելի է համարում ԿԸՀ-ի ավելի վաղ կայացրած որոշումը, որով համաձայնություն էր տրվել Կարապետյանին որպես մեղադրյալ ներգրավելուն։
«Ինձ համար ինչն է կարևոր, որ հիմա ընդգծենք․ այն փաստը, որ մեղադրանք առաջադրելու գործընթացի վերաբերյալ ԿԸՀ-ն համաձայնություն է տվել, դա մեզ համար նույնչափ անընդունելի է»,- ասել է փաստաբանը՝ նշելով, որ իր գնահատմամբ այդ որոշումը ևս պետք է վերադարձվի։
Անդրադառնալով դատախազության կողմից միջնորդությունը կրկին ներկայացնելու, այդ թվում՝ արդեն Ազգային ժողով տանելու հնարավորությանը, Վարդևանյանը նշել է, որ իրավական տեսանկյունից դրա համար հիմքեր չի տեսնում։
«Ողջամտության սահմաններում ես չեմ կարող կանխատեսել, թե ինչ նոր իրավական աբսուրդներ կտեսնենք, կամ Նարեկ Կարապետյանի նկատմամբ հետապնդումների, աբսուրդային միջամտությունների ինչ նոր դրսևորումներ կտեսնենք։ Պարզապես իրավական տեսանկյունից կարող եմ ասել, ողջամիտ իրավունքի պայմաններում դա հնարավոր չէ»,- ընդգծել է Արամ Վարդևանյանը։
Ավելի վաղ դատախազությունն Armenia Today-ին հայտնել էր, որ չի կարող բացահայտել միջնորդության բովանդակությունը՝ «նախաքննության շահերից ելնելով»։ Կարապետյանը գլխավորում է խորհրդարանում 29 մանդատ ունեցող երկրորդ քաղաքական ուժը։ Դաշինքի առաջնորդ Սամվել Կարապետյանն ավելի վաղ հայտնել էր, որ Նարեկ Կարապետյանը պատրաստվում է վերցնել մանդատը։
Կարապետյանը մայիսին հայց էր ներկայացրել ՀՀ քննչական կոմիտեի դեմ՝ պահանջելով հերքել իր հասցեին տարածված և իրականությանը չհամապատասխանող այն տեղեկությունները, թե թաքցրել է այլ պետության քաղաքացիություն ունենալու փաստը։
